काठमाडौं । कोरोना रोकथाम तथा नियन्त्रण उच्चस्तरीय समितिको बैठकले लकडाउनको अवधि थप गर्न सरकारलाई सिफारिस गरेकाे छ ।
मंगलबार साँझ सम्पन्न बैठकले संक्रमण फैलन नदिन र मृत्युको संख्या शून्यमै कायम राख्न लकडाउन बढाउन सिफारिस गरेको समितिले जनाएको छ ।
उपप्रधान तथा रक्षामन्त्री ईश्वर पोखरेल नेतृत्वकाे समितिको बैठकमा मंगलबार प्रधानमन्त्री केपी ओलीसमेत उपस्थित थिए ।
मन्त्रिपरिषद् कार्यालयका सचिव नारायण विडारीका अनुसार कृषि र उद्योग क्षेत्रका कामलाई मापदण्ड अनुसार निरन्तरता दिँदै कोरोना नियन्त्रणमा अहिले भएका सबै प्रयासलाई यथावत राख्दै संक्रमण शून्यमा झार्ने विषयमा छलफल भएको थियाे ।
बुधबार बेलुका बस्ने मन्त्रिपरिषद बैठकले लकडाउनको म्याद थपको निर्णय गर्ने छ ।
‘लकडाउनको नीति जे छ त्यही अनुसार अगाडि बढ्छ। यस विषयमा नेपाल सरकार मन्त्रिपरिषद् बैठकबाट थप निर्णय हुनेछन्’, सचिव विडारीले भने, ‘अहिलेको स्थिति सही छ। यही ढंगले अगाडि बढ्छ । लकडाउन निरन्तर हुन्छ ।’
चैत ११ गते सुरु भएको लकडाउन वैशाख २५ गते सकिँदै छ ।
प्रकाशित मिति: मंगलबार, वैशाख २३, २०७७ १४:००
