काठमाडाैं । सरकारले १ साताका लागि घोषणा गरेको लकडाउनकाे अवधि बढाउने तयारी गरेको छ ।
लकडाउनको अवधि थप्न गर्नेलगायका विषयमा निर्णय गर्न आइतबार दिउँसो उपप्रधानमन्त्री एवं रक्षामन्त्री ईश्वर पोखरेलको संयोजकत्वमा गठित उच्चस्तरीय समन्वयन समितिको बैठक बस्दै छ ।
यसैगरी आइतबार साँझ नै मन्त्रिपरिषाद् बैठक पनि बाेलाइएकाे छ । गत आइतबार बसेको मन्त्रिपरिषद् बैठकले भारत र चीनको सीमा नाका १साताका लागि बन्द गर्ने निर्णय गरेको थियो ।
परराष्ट्रमन्त्री एवं कोरोना नियन्त्रण तथा रोकथाम उच्चस्तरीय समितिका सदस्य प्रदीपकुमार ज्ञवालीका अनुसार अहिलेसम्म लकडाउन सफल भएको र कोरोना संक्रमण फैलन नदिन लकडाउन केही दिन थप गर्नेबारे छलफल भइरहेको बताए ।
लकडाउन थप गर्नेबारे औपचारिक निर्णय भइनसके पनि जनतालाई तयारी अवस्थामा रहन उनले आग्रह गरेका छन् ।
१४ दिनसम्म कोरोना भाइरसको संक्रमण देखिने जोखिम हुने भएकाले शंकास्पद बिरामीको पहिचान र उपचार गर्न सहज वातावरण बनाउन पनि लकडाउन थप्ने निर्णय हुन सक्ने उनकाे भनाइ थियाे । यसअघि समितिका संयोजक ईश्वर पोखरेलले पनि लकडाउन अवधि बढ्न सक्ने बताएका थिए ।
भारतमा २१ दिनको लामो लकडाउन लगाइएको छ । साेही आधारमा नेपालमा पनि लकडाउन थप्ने तयारी गरिएकाे हाे ।
यसैगरी मन्त्रिपरिषद् बैठकले राहत प्याकेजकाे पनि घोषणा गर्न सक्ने जनाइएकाे छ ।
प्रकाशित मिति: आइतबार, चैत १६, २०७६ ०६:४२