काठमाडौं । नेपाली कांग्रेसका नेता शशांक कोइरालाले नवलपरासीमा पार्टी विधानविपरीत जिल्ला सभापतिको अधिकार दिइएको भन्दै केन्द्रीय सभापति शेरबहादुर देउवाको ध्यानाकर्षण गराएका छन् ।
आफ्नो प्यानलका अर्जुनकुमार पोखरेललाई हटाएर विष्णुप्रसाद पौडेललाई सभापति बनाएपछि रुष्ट बनेका कोइरालाले देउवालाई पुरानै कार्यसमिति कायम गर्न माग गरेका हुन् ।
पार्टी सभापति देउवालाई शुक्रबार पत्र लेख्दै कांग्रेस महामन्त्री कोइरालाले कार्यबाहक सभापतिको रुपमा जिम्मेवारी सम्हालिरहेका अर्जुनकुमार पोख्रेललाई नै यथावत् राख्न माग गरेका हुन् ।
सभापति देउवाले फागुन २३ गते कांग्रेसको विधान, २०१७ (संशोधनसहित) को धारा २५ (७) बमोजिम भन्दै विष्णुप्रसाद पौडेललाई नवलपरासी सभापतिको हैसियतमा काम गर्ने गरी अधिकार दिएका थिए । त्यसको विरोध गर्दै पुरानै कार्यसमितिलाई यथावत् राख्न कोइरालाले चेतावनी दिएका हुन् ।
नवलपरासी जिल्ला विभाजनपश्चात् नवलपरासी (वर्दघाट सुस्ता पश्चिम) मा रिक्त रहेको सभापतिमा पार्टी विधानको धारा ५० को उपधारा (८) बमोजिम साविक नवलपरासी उपसभापतिलाई कार्यवाहक सभापतिको जिम्मेवारी दिइएको पत्रमा स्मरण गराइएको छ ।
‘धारा ५० (८) ले सम्बन्धित तहको अधिवेशन तोकिएको अवस्थामा वा महाधिवेशन तोकिएको अवस्थामा वा ६ महिनाभित्र महाधिवेशनको मिति नै तोकिएमा सभापतिका लागि अलग्गै निर्वाचन गर्नु पर्ने छैन भन्ने व्यवस्था गरेको छ’, पत्रमा भनिएको छ, ‘यस व्यवस्थाले नयाँ अधिवेशन गर्न सक्ने वा पाउने अवस्था देखिएन र विधान बमोजिम कार्यवाहक सभापति हुँदाहुँदै नयाँ सभापति तोक्ने हामीसँग कुनै वैधानिक बाटो छैन ।’
प्रकाशित मिति: शुक्रबार, फागुन ३०, २०७६ १२:२७
