काठमाडौं । कोरोना भाइरसको संक्रमण विश्वव्यापी फैलिएकाले सतर्कता अपनाउँदै सरकारले नेपाल भ्रमण वर्ष- २०२० स्थगित गर्ने तयारी गरेको छ ।
भ्रमण वर्ष स्थगित गर्नेबारे आइतबार बसेको मन्त्रिपरिषद बैठक र उच्चस्तरीय समितिमा छलफल भए पनि औपचारिक घोषणा भने हुन बाँकी छ ।
बैठकमा कोरोना भाइरसको संक्रमण विभिन्न देशमा फैलिरहेका बेला सतर्कता अपनाउँदै भ्रमण वर्ष स्थगित गर्नेबारे छलफल भएको एक मन्त्रीले बताए ।
स्राेतका अनुसार बैठकमा प्रधानमन्त्री केपी शर्मा ओलीले भ्रमण वर्ष स्थगित गरेर सन् २०२२ लाई भ्रमण वर्ष घोषणा गर्ने प्रस्ताव राखेका थिए । बैठकमा प्रधानमन्त्रीले भ्रमण वर्ष स्थगित गर्ने प्रस्ताव गरेपछि त्यसबारेमा छलफल गरेर स्थगित गर्ने तयारी भएको जनाइएको छ ।
कोरोनाको संक्रमणबाट नेपाल उच्च जोखिममा छ । बैठकमा गहन छलफल भयो , स्राेतले भने, स्थगनको निर्णय भइहालेको छैन । तर सम्भावना छ ।
यसै क्रममा बहुप्रचारित सगरमाथा संवाद कार्यक्रम अहिलेलाई स्थगित गरिएको छ भने अर्काे सातादेखि अनअराइभल भिसामा पनि रोक लगाइँदै छ ।
मन्त्रिपरिषद् बैठकले नेपालमा कोरोनाको संक्रमण भित्रन नदिन २०-२२ चैतमा गर्न लागिएको सगरमाथा संवाद कार्यक्रम अहिलेका लागि स्थगित गर्ने निर्णय गरेको हो ।
प्रकाशित मिति: सोमबार, फागुन १९, २०७६ ०३:५८