काठमाडौं । अर्थमन्त्री डा. युवराज खतिवडाले चैत ५ गतेभित्रै नेपाल राष्ट्र बैकमा नयाँ गभर्नर नियुक्त हुने बताएका छन् ।
मन्त्रिपरिषद्का निर्णय सार्वजनिक गर्न सूचना तथा सञ्चार प्रविधि मन्त्रालयमा आयोजित नियमित पत्रकार सम्मेलनमा बोल्दै अर्थमन्त्री तथा सञ्चारमन्त्री युवराज खतिवडाले नेतृत्वविहीन हुने अवस्था नआउने बताएका हुन् ।
आगामी चैत ५ गते गभर्नर चिरञ्जीवी नेपालको कार्यकाल सकिने छ । उनको कार्यकाल सकिनु १ महिनाअघि नै नियुक्ति प्रक्रिया सुरु गर्नुपर्नेमा अहिलेसम्म सरकारले नियुक्तिको प्रक्रिया अगाडि बढाउन सकेको छैन ।
यसैगरी मन्त्री खतिवडाले विदेशबाट ल्याइने पुस्तकमा लगाएकाे कर नहट्ने बताएका छन् । उनले विभिन्न मुलकले पुस्तक बिक्रीमा ५ देखि १८ प्रतिशत कर लगाउने गरेको बताउँदै अर्बौं लगानी गरेर नेपालमा छापाखाना खुलेकाले स्वदेशी उद्योगलाई संरक्षण गर्नु सरकारको दायित्व भएको पनि बताए ।
नेपालमा खुलेका छापाखानाले कागज ल्याउँदा समेत १५ प्रतिशत कर तिर्नुपर्ने भएकाले उनीहरुले कर नै नतिरी ल्याउने पुस्तकसँग प्रतिस्पर्धा गर्न नसक्ने खतिवडाकाे तर्क थियाे ।
‘पुस्तक पनि व्यापार हो । पुस्तकको व्यापार गरेर नाफा कमाइन्छ भने कर पनि लाग्छ,’ खतिवडाले भने, ‘यो ज्ञानको व्यापार होइन ।’
यसैबीच सरकारले पेट्रोलियम पदार्थमा थप ५ रुपैयाँ विकास कर लगाउने निर्णय गरेको छ । फागुन १२ गते बसेको मन्त्रिपरिषद बैठकले पेट्रोलियम पदार्थमा थप ५ रुपैयाँमा कर लगाउने निर्णय गरेको प्रवक्ता खतिवडाले जानकारी दिए ।
योसँगै पेट्रोल र डिजेलमा विकास कर १० रुपैयाँ हुने छ । यसअघि सरकारले बूढीगण्डकी जलविद्युत आयोजना निर्माणका लागि पेट्रोलियम पदार्थमा प्रतिलिटर ५ रुपैयाँ कर लगाउन सुरु गरेको थियो ।
प्रकाशित मिति: बिहीबार, फागुन १५, २०७६ १०:१३