बिर्तामोड । नेपाल कम्युनिस्ट पार्टी (नेकपा) झापाले आगामी फागुन २१ गते बिर्तामोडमा सुखानी शहीद ४७औं स्मृति तथा श्रद्धाञ्जली सभा आयोजना गर्ने भएको छ ।
भद्रपुरबाट जेल सार्ने बहानामा झापा र इलामको सिमाना सुखानीको जंगलमा तत्कालीन राजनीतिक बन्दीहरु रामनाथ दाहाल, नेत्र घिमिरे, नारायण श्रेष्ठ, कृष्ण कुइँकेल र विरेन राजवंशीको २०२९ फागुन २१ गते हत्या गरिएको थियो । सो दिनको स्मरणमा हरेक वर्ष स्मृति दिवस मनाउने गरिएको छ ।
नेकपा झापाले आयोजना गरेको उक्त वृहत् स्मृतिसभामा पार्टी अध्यक्ष तथा प्रधानमन्त्री केपी शर्मा ओली र अर्का अध्यक्ष तथा पूर्वप्रधानमन्त्री पुष्पकमल दाहाल प्रचण्डसहित पूर्वप्रधानमन्त्री तथा पार्टीका वरिष्ठ नेता झलनाथ खनालले सम्बोधन गर्ने कार्यक्रम तय भएको अध्यक्ष चिन्तन पाठकले जानकारी दिए ।
उनका अनुसार पार्टी अध्यक्षद्वय, वरिष्ठ नेता खनाल, महासचिव विष्णु पौडेल र गृहमन्त्री रामबहादुर थापालगायत नेताहरुले सुखानी शहीद स्कृति पार्क सालबारीमा शहीदको शालिकमा माल्यार्पण गर्ने कार्यक्रम छ । माल्यार्पणपछि बिर्तामोडको सुगम पेट्रोल पम्पनजिकै रहेको खुला मैदानमा वृहत् श्रद्धाञ्जली सभा गरिने तय भएको अध्यक्ष पाठकले बताए ।
यसैबीच, नेकपा १ नम्बर प्रदेश कमिटीको बैठक फागुन १९ गते बिर्तामोडस्थित जिल्ला पार्टी कार्यालयमा र प्रदेशस्तरीय प्रशिक्षण कार्यक्रम २० गते बिर्तामोडको सिटी सेन्टरमा आयोजना गरिएको नेकपा झापाका सचिव एवम् प्रचार तथा प्रकाशन विभाग प्रमुख मणिकुमार साम्पाङले जनाएका छन् ।
साम्पाङका अनुसार प्रदेश कमिटीको बैठकमा १ नम्बर प्रदेश अन्तर्गतका नेकपा केन्द्रीय सदस्यहरुको पनि सहभागिता रहने छ । यस्तै २० गतेको प्रशिक्षणमा १४ वटा जिल्ला कमिटी र विराटनगर महानगर कमिटीका सचिवालय सदस्यहरु सहभागी हुने प्रदेशस्तरीय प्रशिक्षण कार्यक्रम आयोजना गरिएको छ ।
नेकपा झापा जिल्ला प्रचार विभागको बैठकले २१ गतेको स्मृतिसभालाई वृहत् बनाउन झापासहित छिमेकी जिल्लाका पार्टी कार्यकर्तालाई सहभागिताका लागि आह्वान गर्ने निर्णय भएको प्रचार तथा प्रकाशन विभागका उपप्रमुख सन्तोष आचार्यले जनाएका छन् ।
प्रकाशित मिति: बिहीबार, फागुन १५, २०७६ ०७:५७
