काठमाडाैं । बुधबार बिहान बालुवाटारस्थित प्रधानमन्त्री निवासमा प्रमुख सत्तारुढ दल नेकपाकाे सचिवालय बैठक बस्याे । बैठक सकिनासाथ सचिवालय सदस्य तथा पार्टी प्रवक्ता नारायणकाजी श्रेष्ठले निर्णय सुनाए- पार्टी उपाध्यक्ष वामदेव गाैतमलाई राष्ट्रियसभा सदस्यमा लैजाने ।
तर त्यसकाे ४ घण्टा नबित्दै अर्काे समाचार आयाे- वामदेवलाई प्रधानमन्त्रीले राष्ट्रियसभामा सिफारिस नगर्ने । वर्मान अर्थमन्त्री युवराज खतिवडालाई नै निरन्तरता दिने । यसले राजनीतिक माहाेल तताएकाे छ यतिबेला । मुख्यतः प्रश्न उब्जिएकाे छ- आखिर आफैँ सहभागी बैठले गरेकाे निर्णय किन उल्टाउँदै छन् केपी शर्मा ओली ?
ओली निकट स्राेतका अनुसार बुधबार बसेकाे बैठकमा वामदेवलाई राष्ट्रियसभामा लाने विषयमा पर्याप्त छलफल नै भएन । ओलीइतरका सचिवालय सदस्यले यसअघि नै निर्णय गरेर ल्याएकाे र बैठकमा त्यसलाई अनुमाेदन गराइएकाे थियाे ।
बैठकमा अन्य सदस्यहरूले पहिल्यै निर्णय गरेर आएकाले वामदेवलाई राष्ट्रियसभा सदस्यमा मनोनीत गरौँ भनेर असन्तोष मिश्रित भाषामा ओलीले स्वीकृति दिएको सचिवालयका एक सदस्यले बताए ।
सचिवालय बैठकको निर्णय गरे पनि ओली त्यसमा सहमत नभएकाे स्राेतले बताएकाे छ । अध्यक्ष ओलीले आफ्ना विरुद्ध खेल भएको भन्दै सचिवालयका केही नेतालाई फोन गरेर वामदेवलाई राष्ट्रियसभामा सिफारिस नगर्ने चेतावनी दिएका छन् ।
यसैगरी पूर्वप्रधानमन्त्री तथा नेकपा सचिवालय सदस्य झलनाथ खनालले प्रधानमन्त्री तथा अध्यक्ष ओलीकै उपस्थितिमा सर्वसम्मत गौतमलाई राष्ट्रियसभामा लाने निर्णय भएकाे बताए ।
खनालले गौतमलाई राष्ट्रियसभा सदस्य बनाउने निर्णय प्रधानमन्त्री ओलीको समेत चाहनामा भएको हुनाले निर्णय उल्टिने सम्भावना नरहेको बताए । ‘सचिवालय बैठकमा पार्टी अध्यक्ष ओली नहुने कुरै भएन, गौतमको नाममा कसैले पनि असहमति जनाएका छैनन्,’ उनले भने, ‘त्यसबारे केही आएका छन् भने त्यो गलत हो।’
प्रकाशित मिति: बुधबार, फागुन १४, २०७६ १०:२४
