काठमाडौं । पूर्वप्रधानमन्त्री डा. बाबुराम भट्टराईले आफूले नीतिगत र विधिसम्मत् ढंगले मातातीर्थको जग्गा मोहीलाई वितरण गरेको दाबी गरेका छन् ।
बुधबार बसेकाे प्रतिनिधिसभा बैठककाे विशेष समयमा बोल्दै समाजवादी पार्टीको संघीय परिषद् अध्यक्षसमेत रहेका भट्टराईले आफ्नो सरकारले जानिबुझी मातातीर्थको करिब १ सय ७३ रोपनी जग्गा मोही कायम गरेर वितरण गरेको बताएका हुन् ।
बालुवाटारको ललिता निवास जग्गा प्रकरण र मातातीर्थको जग्गा प्रकरण एउटै नभएको भट्टराईको तर्क थियो । प्रधानमन्त्री केपी शर्मा ओलीले गत फागुन ३ गते सदनलाई सम्बोधन गर्ने क्रममा माथातीर्थ जग्गा प्रकरणबारे छानबिन गर्ने बताएका थिए ।
प्रधानमन्त्री ओलीतर्फ संकेत गर्दै डा. भट्टराईले राजनीतिक प्रतिशोध साँध्नका लागि लोकमान प्रवृत्ति देखाएर तर्साउन खोजे प्रत्यूत्पादक हुने चेतावनी दिए ।
अहिले त्यो जग्गा आफ्नो भएको दाबी गर्ने नेपाल ट्रस्टकै सचिवको नेतृत्वमा छानबिन समिति बनेको र त्यसको प्रतिवेदनका आधारमा निर्णय भएको भट्टराईले जनाए ।
मालपोतबाट भएकाे निर्णय हेर्दासमेत सबै कार्यविधि पूरा गरेको पाइएको उनले बताए । त्यहाँको जग्गाबारे परेको एउटा मुद्दामा तत्कालीन पुनरावेदन अदालत पाटनले समेत फैसला गरेको उल्लेख गर्दै भट्टराईले भने, ‘ललिता निपवासमा जस्तो कसैले लाभ लिएको पुष्टि हुँदैन । मेरो सरकारको पालामा भएको निर्णय राजनीतिक, कानुनी र नैतिक रुपमा सही छ ।’
प्रतिशोध हो कि ? निषेध हो कि भनेर भनेर शंका नगर्ने भन्दै उनले भने, ‘अहिले यती होल्डिङ्सको चर्चा छ । उसलाई अझै नपुगेकाले जनताले नपाए पनि उसलाई दिउँ भन्ने चाहना हो भने छलफल गरौं ।’
तत्कालीन अख्तियार प्रमुख लोकमानसिंह कार्कीले सबैलाई तर्साउने र झुकाउँछु भनेर लागेको स्मरण गर्दै उनले प्रधानमन्त्री ओलीले लोकमान प्रवृत्ति देखाउन खोजेको भए २०५१ मा भित्तेकाण्ड सझिन चेतावनी दिए ।
लोकमान प्रवृत्ति भनेर हामीले चिनेका छौं । उनले सबैलाई मुद्दा लगाएर तर्साएर आफ्नो फाइदा लिने काम गर्थे । यदि त्यसै गर्न खोजिएको हो भने म प्रधानमन्त्रीलाई आग्रह गर्न चाहन्छु- जतिबेला हामीले २०५१ सालमा जनयुद्धको हामीले तयारी गर्दै थियौं , भट्टराईले भने, त्यतिबेला चर्चित भित्ते काण्ड भएको थियो । त्यतिबेला सिंहदरबार अगाडि म लगायतका साथीहरु, उहाँ गृहमन्त्री हुनुहुन्थ्यो, उहाँलाई हामीले ज्ञापन पत्र बुझाउन जाँदा उहाँको अरिंगाल सेनाले मलाई आएर खुकुरीले हानेको प्रसंग अहिले पनि याद छ ।
प्रकाशित मिति: बुधबार, फागुन १४, २०७६ ०९:५७
