काठमाडाैं । उपप्रधानमन्त्री ईश्वर पोखरेलले दरबारमार्ग र ताहाचलको जग्गा यती होल्डिङ्सलाई लिजमा दिँदा क्रमश: पुष्पकमल दाहाल ‘प्रचण्ड’ र शेरबहादुर देउवा प्रधानमन्त्री रहेको उल्लेख गर्दै नेपाल ट्रस्टका तर्फबाट श्वेतपत्र जारी गरेका छन् ।
मंगलबार पत्रकार सम्मेलन गर्दै ट्रस्टका अध्यक्ष तथा उपप्रधानमन्त्री इश्वर पोखरेलले १२ वटा जिल्लामा ट्रस्टको नाममा सम्पत्ति रहेको बताए ।
नेपाल ट्रस्टको नाममा देशभर करिब २२ हजार रोपनी जग्गा छ । सोमध्ये १५ हजार रोपनी त जंगल मात्रै छ ।
त्यस्तै काठमाडौंका केही महँगा ठाउँको जग्गा विभिन्न कम्पनीले लिजमा प्रयोग गरेको पाइएको छ । नेपाल ट्रस्टको नाममा रहेकामध्ये काठमाडौका ६ स्थानमा लिजमा दिइएको उनले बताए ।
गोकर्ण फरेस्ट रिर्सोट, दरबारमार्ग, कमलादी, टेकु र कमलादीको घर तथा जग्गा लिजमा दिइएको पाेखरेलले जानकारी दिए । यो दरबारले दिएको र हाल थप गर्ने कार्य केहीमा भएको उनले बताए ।
ट्रस्टका नाममा ७८ करोड नेपाली रुपैयाँ, अमेरिकी डलर १ लाख ४८ हजार र बेलायती पाउन्ड ५० हजार चल सम्पत्ति रहेको समेत उनले जानकारी दिएका छन् ।
प्रकाशित मिति: मंगलबार, फागुन १३, २०७६ १०:१७
