काठमाडौं । संघीय संसद अन्तर्गतकाे प्रतिनिधिसभाकाे बैठकमा प्रत्यक्ष निर्वाचित कार्यकारी राष्ट्रपतीय शासनकाे विषयमा चर्चा भएकाे छ ।
याे विषयमा चर्चा गरेका हुन् प्रमुख सत्तारुढ दल नेकपाका सांसद शेरबहादुर तामाङले । मंगलबार बसेकाे प्रतिनिधिसभा बैठककाे विशेष समयमा बाेल्दै सांसद तामाङले प्रत्यक्ष निर्वाचित कार्यकारी राष्ट्रपति बनाउने गरी संविधान संशोधनको प्रस्ताव राखेका हुन् ।
पूर्व कानुनमन्त्रीसमेत रहेका तामाङले शासकीय स्वरुप परिवर्तन गर्नुपर्ने बताएका हुन् । संविधान जारी गर्ने बेला त्रुटि भएको भन्दै उनले भने, ‘अब प्रत्यक्ष निर्वाचित कार्यकारी प्रमुखको निर्वाचन प्रणालीमा जानको लागि सबैको ध्यानाकर्षण गराउन चाहान्छु । प्रत्यक्ष निर्वाचित राष्ट्रपतिको प्रणालीमा जाऊँ ।’
तामाङले प्रत्यक्ष निर्वाचित राष्ट्रपतिय प्रणालीमा जाँदा १ सय ५१ सदस्यीय एउटा मात्रै संसद पूर्ण समानुपातिक निर्वाचन प्रणालीबाट निर्वाचित हुने व्यवस्था गर्न समेत उनले प्रस्ताव राखेका छन् ।
तामाङले संघीय संरचनालाई समन्वयकारी मात्र बनाउने र स्थानीय तहको संख्या ७ सय ५३ बाट घटाएर ३ सय ५० को हाराहारीमा ल्याउन समेत प्रस्ताव गरे ।
प्रकाशित मिति: मंगलबार, फागुन १३, २०७६ ०९:०१
