काठमाडौं । सत्तारुढ नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुुष्पकमल दाहाल प्रचण्डबीच बालुवाटारमा भेटवार्ता भएको छ ।
सोमबार बिहान प्रधानमन्त्री निवास बालुवाटारमा दुवै अध्यक्षबीच भेटवार्ता भएको हो । भेटमा राष्ट्रिय सभा सदस्यलाई पनि प्रधानमन्त्री बन्न पाउन सक्ने विषयमा संविधान संशोधनका लागि आवश्यक छलफल भएको बालुवाटार स्रोतले बताएको छ ।
छलफलमा संविधान संशोधनको विषय प्रमुख एजेन्डा रहेको जनाइएको छ । नेकपा उपाध्यक्ष वामदेव गौतमलाई राष्ट्रिय सभामा सदस्यमा राष्ट्रपतिबाट मनोनित गर्ने तयारी छ । त्यसका लागि गौतमले राष्ट्रिय सभा सदस्य पनि प्रधानमन्त्री हुने गरी संविधान संशोधन गर्नुपर्ने माग गर्दै आएका छन् ।
राष्ट्रिय सभाका १९ सदस्यको फागुन २० गते समयावधि सकिँदै छ । त्यसमध्ये १८ जना माघ ९ गते भएको निर्वाचनबाट निर्वाचित भइसकेका छन् भने १ जना भने सरकारको सिफारिसमा राष्ट्रपतिले मनोनित गर्ने व्यवस्था छ।
साेही काेटामा वामदेव गौतमलाई सिफारिस गर्न प्रधानमन्त्री ओली र अध्यक्ष प्रचण्ड छलफलमा जुटेको जनाएको छ । गौतमलाई राष्ट्रिय सभामा ल्याउन ओली पनि सकारात्मक छन् । तर, राष्ट्रिय सभा सदस्यलाई पनि प्रधानमन्त्री बनाउने गरी संविधान संशोधन गर्न भने सहमति बनेको छैन ।
प्रकाशित मिति: सोमबार, फागुन १२, २०७६ ०५:१९