काठमाडाैं । सत्तारुढ दल नेपाल कम्युनिस्ट पार्टी (नेकपा) ले संविधान संशोधनका लागि कार्यदल गठन गरेको छ ।
नेकपाले राष्ट्रियसभा सदस्य पनि प्रधानमन्त्री बन्न मिल्ने गरी संविधान संशोधनको तयारीका लागि कार्यदल बनाएकाे हाे । शनिबार साँझ प्रधानमन्त्री निवास बालुवाटारमा बसेको सचिवालय बैठकले सचिवालय सदस्य माधवकुमार नेपालको नेतृत्वमा ३ सदस्यीय कार्यदल बनाइएको नेकपाले जनाएकाे छ ।
कार्यदलकाे सदस्यमा स्थायी समिति सदस्य सुवासचन्द्र नेम्वाङ र केन्द्रीय सदस्य खिमलाल देवकोटा छन् । कार्यदलले राष्ट्रियसभाको सदस्य पनि प्रधानमन्त्री हुन पाउनेगरी संविधान संशोधनको तयारी गर्ने बताइएको छ ।
नेकपा उपाध्यक्ष वामदेव गौतमले आफूलाई राष्ट्रियसभा सदस्य मनोनित गर्ने हो भने पहिले राष्ट्रियसभा सदस्य पनि प्रतिनिधिसभा सदस्य जस्तै प्रधानमन्त्री बन्न पाउने गरी संविधान संशोधन गर्नुपर्ने माग राखेका थिए ।
गौतमकै मागअनुसार नेकपा अध्यक्ष पुष्पकमल दाहाल प्रचण्डले संविधान संशोधन गर्न गृहकार्यका लागि नेता नेपालको संयोजकत्वमा कमिटी गठन गर्ने प्रस्ताव राखेका हुन् ।
नेपालको नयाँ संविधानअनुसार राष्ट्रियसभाका सदस्य प्रधानमन्त्री हुन नपाउने व्यवस्था छ । राष्ट्रियसभाको सदस्य प्रधानमन्त्री बन्न नपाउने भएपछि गत माघमा भएको राष्ट्रियसभाको निर्वाचनमा गौतमले उम्मेदवारी दिएका थिएनन् ।
प्रकाशित मिति: आइतबार, फागुन ११, २०७६ ११:१८
