काठमाडौँ । प्रधानमन्त्री केपी शर्मा ओली र पूर्वसञ्चारमन्त्री गाेकुल बाँस्काेटासहित ४ जनाविरुद्ध अख्तियार दुरुपयोग अनुसन्धान आयोगमा उजुरी परेको छ।
सेक्युरिटी प्रेस खरिद प्रक्रियामा अनियमितता गरिएको भन्दै ओली र बाँस्कोटाविरुद्ध उजुरी परेको हाे ।
सेक्युरिटी प्रेस खरिद प्रक्रियामा स्विस कम्पनीसँग ७० करोड ‘कमिसन’ मागेको भन्दै नेपालगन्जका प्रेमबहादुर शाही र मकवानपुरका आनन्दराम पौडेलले प्रधानमन्त्री केपी शर्मा ओली, तत्कालिन सञ्चार तथा सूचना प्रविधिमन्त्री गोकुल बाँस्कोटा, तत्कालीन सूचना तथा सञ्चार मन्त्रालयका सचिव महेन्द्रमान गुरुङ र नेपाल सेक्युरिटी प्रेसका सिइओ विकल पौडेलविरुद्ध आइतबार अख्तियारमा उजुरी दिएका हुन् ।
सेक्युरेटी प्रेस खरिद प्रकरणमा एजेन्टसँग ७० करोड घुस मागेको अडियो बाहिरिएपछि बाँस्कोटाले बिहीबार पदबाट राजीनामा दिएका थिए ।
‘प्रधानमन्त्री जस्तो जिम्मेवार र उत्तरदायी पदमा रहेका व्यक्ति यस्तो भ्रष्टाचार भएको प्रमाण आफ्नो जानकारीमा आएपछि भ्रष्टाचार सम्बन्धी अनुसन्धान गर्ने र मुद्दा चलाउने संवैधानिक निकाय अख्तियार दुरुपयोग अनुसन्धान आयोगलाई जानकारी दिनुपर्ने दायित्व र कर्तव्य रहेकामा सो प्रमाण लुकाएबाट निज प्रधानमन्त्री पनि सो भ्रष्टाचारको उद्योग कार्यमा संलग्न र मतियार रहेको स्वतः पुष्टि हुन्छ,’ उजुरीमा भनिएको छ ।
प्रकाशित मिति: आइतबार, फागुन ११, २०७६ १०:५५
