काठमाडौं । सञ्चार तथा सूचना प्रविधि मन्त्री गोकुलप्रसाद बाँस्कोटाले नैतिकताक आधारमा राजीनामा दिएको बताएका छन् ।
सेक्युरिटी प्रिन्टिङ प्रेसको खरिदमा कमिसन मागेको आरोप लागेका बाँस्कोटाले बिहीबार दिउँसो प्रधानमन्त्री केपी शर्मा ओलीलाई राजीनामा बुझाएका हुन्।
उनी आफैँले राजीनामाबारे सामाजिक सञ्जालमार्फत जानकारी दिएका हुन् । केहीबेर अघि ट्वीट गर्दै मन्त्री बाँस्कोटाले भनेका छन्, ‘मेरो बारेमा प्रश्न उठेकाले सम्मानीय प्रधानमन्त्रीज्यू समक्ष नैतिकताको आधारमा मन्त्री पदबाट राजीनामा दिएको जानकारी गराउँदछु ।’
यसअघि सभामुख अग्निप्रसाद सापकोटाले मन्त्री बाँस्कोटाको राजीनामाबारे आफूले अनौपचारिक जानकारी पाएको बताएका थिए ।
सेक्युरिटी प्रिन्टिङ मेसिन खरिदका सन्दर्भमा कमिसन रकमका बारेमा गरेको डिल को अडियो रेकर्ड सार्वजनिक भएपछि उनी विवादमा आएका थिए । साेही विषयलाई लिएर प्रमुख प्रतिपक्षी दल नेपाली कांग्रेसकाे अवराेधका कारण प्रतिनिधिसभा बैठक फागुन १३ गतेसम्मका लागि स्थगित भएकाे छ ।
प्रकाशित मिति: बिहीबार, फागुन ८, २०७६ ११:१८
