काठमाडौं । प्रमुख प्रतिपक्षी दल नेपाली कांग्रेसका सांसद गगन थापाले प्रतिनिधिसभाको बैठकमा स्वस्थानी कथा को श्लोक शैलीमा बालुवाटारको ललिता निवास जग्गा प्रकरणमाथि व्यंग्य गरेका छन् ।
मंगलबार बसेको प्रतिनिधिसभाको बैठकमा बोल्दै सांसद थापाले स्वास्थानी कथा पढेकै शैलीमा बालुवाटार प्रकरणमा उन्मुक्ति पाएका र संरक्षण दिनेमाथि कडा व्यंग्य गरेका हुन् ।
के भने गगनले सदनमा
सम्माननीय सभामुख महाेदय
कुमारजी आज्ञा गर्नुहुन्छ हे विष्णुमणि अब उप्रान्त कसैको चोरीको सामान किन्दा सकेसम्म लोकलाई थाहा नहुने गरी किन्नू । थाहा पाइहाले होइन, होइन भन्नू । चित्त बुझाउन नसकेर अप्ठ्यारोमा पर्ने भए हत्तपत्त चोरीको सामान फर्काउनु र २ पटक विष्णु, विष्णु भन्नू । त्यसमा पनि लोकले चित्त बुझाएनन् भने गोकुलधाममा गएर खड्ग उचाल्नु र ४ पटक विष्णु, विष्णु भन्नू ।
त्यसको प्रभावले तिम्रो र हाम्रो अनुहारमा लागेको दाग लोकले देखे पनि, देख्नुपर्नेले देख्ने छैनन् । इतिश्री अख्तियार पुराणे, कुमार विष्णु संवादे, श्री स्वस्थानी व्रतकथायां बालुवाटार प्रकरण वर्णनम् प्रथमोध्याय । धन्यवाद
प्रकाशित मिति: मंगलबार, फागुन ६, २०७६ ०८:३६
