काठमाडौँ । शुक्रबार बसेकाे प्रतिनिधिसभाको बैठक शोक प्रस्ताव पारित गरेर स्थगित भएको छ ।
राष्ट्रियसभा सांसद दुर्गाप्रसाद उपाध्यायको आज बिहान भएकाे निधनमा दुःख व्यक्त गर्दै शोक प्रस्ताव पारित गरी शनिबार ११ बजेसम्मका लागि बैठक स्थगित भएको हो । बैठकमा सभामुख अग्निप्रसाद सापकोटाले प्रस्तुत गरेको शोक प्रस्तावलाई सर्वसम्मत पारित भएकाे थियाे ।
यसैबीच, राष्ट्रियसभा सांसद उपाध्यायको निधनका कारण प्रधानमन्त्रीले प्रतिनिधसभामा गर्ने भनिएकाे सम्बाेधन शनिबारका लागि सरेकाे छ । सांसद् उपाध्यायको निधन भएको भन्दै प्रमुख प्रतिपक्षी नेपाली कांग्रेसले प्रतिनिधिसभामा हुन लागेको प्रधानमन्त्रीको सम्बोधन स्थगित गर्न माग गरेको थियाे ।
बहालवाला सांसदको निधन भएकाले शुक्रबारकाे बैठक शोक प्रस्ताव पारित गरेर स्थगित भएकाे हाे । संसद सचिवालयका सचिव गोपलानाथ योगीका अनुसार बहालवाला सांसदको निधनमा शोक प्रस्ताव पारित गरेर संसद बैठक स्थगित गर्ने निर्णय यसअघि नै भएको थियो ।
शुक्रबार बस्ने प्रतिनिधिसभा बैठकमा प्रधानमन्त्री ओलीले सम्बोधन गर्ने कार्यक्रम थियो । सरकारका २ बर्से उपलब्धि संसदमार्फत जानकारी गराउन उनले सम्बाेधन गर्न लागिएकाे बताइएकाे थियाे ।
आजकाे सम्बाेधन स्थगित भएपछि प्रधानमन्त्री ओलीले भालि शनिबार ११ बजे बस्ने प्रतिनिधसभा बैठकमा सम्बाेधन गर्ने ओलीका प्रेस सल्लाहकार सूर्य थापाले जानकारी दिए ।
प्रकाशित मिति: शुक्रबार, फागुन २, २०७६ ०८:४०