काठमाडौं । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले टाउकोको मूल्य तोकेकै कारण पार्टीको नेतृत्वबाट परिवर्तन सम्भव भएको बताएका छन् ।
२५औं जनयुद्ध दिवसका अवसर पार्टी केन्द्रीय कार्यालय धुम्बाराहीमा आयोजित श्रदाञ्जली सभालाई सम्बोधन गर्दै प्रचण्डले धेरैले शान्ति सम्झौता हुन्छ भनेर नसोचेको बताए ।
कार्यक्रमलाई सम्बाेधन गर्दै प्रचण्डले नेपाली कम्युनिस्टहरु तत्कालीन सोभियत युनियनको कम्युनिस्टजस्तो नभइयोस् भन्ने कामनासमेत गरे ।तत्कालीन सोभियत युनियनका कम्युनिस्टको इतिहासलाई बुझेर उनीहरुका कमी–कमजोरीलाई सच्याउँदै नेपाली कम्युनिस्टहरु मौलिक ढङ्गले अघि बढ्नुपर्ने खाँचो उनले औँल्याए ।
प्रचण्डले सत्तामा पुगेपछि कम्युनिस्टमा विचलन आउने भन्दै आफूहरू सत्ता स्वार्थमा नलाग्ने बताएका छन् । कम्युनिस्टको रोगको कारक नेताहरू नै भएको भन्दै अध्यक्ष दाहालले भने, सत्ता स्वार्थमा लाग्नु हुँदैन भन्ने हामीले बुझेका छौँ, हामी त्यसमा सचेत छौँ । राष्ट्र र जनताप्रति हामी गलत गर्दैनौँ ।
जनवादी क्रान्ति मौलिकतामा सम्पन्न भएको र समाजवादतर्फ पनि मौलिकतामै अघि बढ्ने प्रष्ट पार्दै प्रचण्डले भने, ‘शान्तिपूर्ण, प्रतिस्पर्धात्मक, लोकप्रिय मत ल्याएर शासन सत्तालाई सुशासनमा बदलेर सामाजिक न्याय, विकास निर्माण, समतामुलक समाज निर्माण गर्न मेहनत गरेर समाजवाद बनाउने बाटोतर्फ छौँ ।’
यसैगरी प्रचण्डले समाजवादका लागि फेरि आन्दोलन हुने पनि बताए । उनले समाजवादका लागि अब हुने आन्दोलन शान्तिपूर्ण रहने पनि बताए । माओवादी विघटन गरेर नेकपा बनाउनु समाजप्रतिको चिन्ता भएको उनको भनाइ थियो ।
प्रकाशित मिति: बिहीबार, फागुन १, २०७६ ०५:४५
