काठमाडौं । सत्तारुढ दल नेपाल कम्युनिस्ट पार्टी नेकपाले आज विभिन्न कार्यक्रम गरी जनयुद्ध दिवस मनाइरहेको छ । पार्टी केन्द्रीय कार्यालय धुम्बाराहीमा एक श्रद्धाञ्जली सभा आयोजना गरी नेकपाले २५औं जनयुद्ध दिवस मनाएको हो ।
कार्यक्रममा पार्टी अध्यक्ष पुष्पकमल दाहाल प्रचण्ड सहभागी हुँदा अर्का अध्यक्ष एवं प्रधानमन्त्री केपी शर्मा ओली भने अनुपस्थित भए ।
यसअघि नेकपा केन्द्रीय कार्यालयका सचिवद्वय ईश्वरी रिजाल र श्रीराम ढकालले संयुक्त रुपमा सूचना जारी गरी ओली र प्रचण्ड दुवैको सहभागितामा कार्यक्रम हुने जानकारी दिएका थिए । ओली जनयुद्ध दिवसको अवसरमा अघिल्लो वर्ष आयोजना गरिएको कार्यक्रममा पनि सहभागी भएका थिएनन् ।
तत्कालीन नेकपा माओवादीले २०५२ साल फागुन १ गतेदेखि राज्यसत्ताविरुद्ध थालेको संघर्षको सम्झनामा नेकपाले जनयुद्ध दिवस मनाउने गरेको छ ।
‘माओवादी जनयुद्ध’ नाम दिएको सशस्त्र आन्दोलन २०६३ सालमा विसर्जन भएको थियो । त्यसपछि भएका धेरै राजनीतिक परिवर्तनको केन्द्रभागमा पूर्व माओवादी रहँदै आएको छ ।
१ दशकसम्म चलेको जनयुद्धले नेपाली राजनीतिमा ठूलो परिवर्तन ल्याएपनि यसको औचित्यमाथि बहस टुंगिएको छैन ।
प्रकाशित मिति: बिहीबार, फागुन १, २०७६ ०५:००