काठमाडाैं । बालुवाटारस्थित ललिता निवास जग्गा प्रकरणमा अख्तियार दुरुपयोग अनुसन्धान आयोगले १ सय ७५ जनाविरुद्ध मुद्दा दायर गरेपछि सोही प्रकरणमा मुछिएका पूर्वप्रधानमन्त्री डा. बाबुराम भट्टराईले प्रतिक्रिया दिएका छन् ।
समाजवादी पार्टीका अध्यक्षसमेत रहेका डा. भट्टराईले ललितानिवास जग्गा हिनामिना प्रकरणमा आफूले पनि असहजता महसुस गरेको बताएका छन् ।
‘मन्त्री दोषी तर प्रम निर्दोष देखिँदा मैले पनि असहजता महसुस गरेको छु । सुर–असुर द्वन्द्वबाट निस्केको कालकुट विष पिएर शिवजी नीलकण्ठ बनेझैं देशलाई आवश्यक पर्छ भने म पनि नीलकण्ठ बन्न तयार छु । तर दोषीलाई छोड्ने, निर्दोषलाई फसाउने नहोस्,’ भट्टराईले ट्विटरमार्फत भनेका छन्, ‘जानीजानी दुष्कर्म गर्नेले सत्ताको छहारी पाउने तर परिबन्धले अघिदेखि फस्ने नहोस् ।’
उनले ट्विटरमा भनेका छन्, ‘देशमा व्याप्त भ्रष्टाचार रुपी क्यान्सरको एउटा अंश ललितानिवास प्रकरणमा अदुअआको प्रयत्न स्वागतयोग्य छ तर प्रथमदृष्टिमा यसमा कतिपय त्रुटि र अपूर्णता देखिन्छ ।’
अख्तियारले विशेष अदालतमा दायर गरेको मुद्दामा पूर्वप्रधानमन्त्री डा. भट्टराई र माधव कुमार नेपाललाई पनि दोषी देखाइएको छ तर उनीहरुविरुद्ध मुद्दा दायर गरेको छैन । तर सोही प्रकरणमा मन्त्री रहेका विजयकुमार गच्छदारसहित ३ मन्त्रीविरुद्ध भने मुद्दा दायर भएको छ।
प्रकाशित मिति: बिहीबार, माघ २३, २०७६ ०६:२४