काठमाडौँ । बालुवाटार जग्गा प्रकरणमा पार्टी उपसभापति विजयकुमार गच्छदारविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा चलाएपछि नेपाली कांग्रेसले आकस्मिक बैठक बोलाएको छ ।
पार्टी सभापति शेरबहादुर देउवाको निवासमा जारी बैठकमा गच्छदारमाथि अख्तियारले चलाएको मुद्दा र पार्टीले त्यसमा लिने धारणाबारे छलफल भइरहेको छ। बैठकमा कानुन व्यवसायीहरू पनि उपस्थित छन् ।
वरिष्ठ नेता रामचन्द्र पौडेललगायत पार्टीका शीर्ष नेताहरूले पार्टीनिकट कानुन व्यावसायीसँग छलफल गरिरहेका छन् ।
बालुवाटारस्थित ललिता निवासको सरकारी जग्गा व्यक्तिको नाममा दर्ता गरेको अभियोगमा अख्तियारले गच्छदारसहित १ सय ७५ जनाविरुद्ध विशेष अदालतमा भ्रष्टाचार मुद्दा दायर गरेको थियाे ।
तत्कालीन उपप्रधान तथा भौतिक पूर्वाधार मन्त्री गच्छदारमाथि ९ करोड ६५ लाख ७६ हजार रुपैयाँ बिगोसहित भ्रष्टाचार मुद्दा दायर भएको हाे ।
प्रकाशित मिति: बिहीबार, माघ २३, २०७६ ०६:१४
