काठमाडौं । एमसिसीमार्फत अमेरिकाबाट प्राप्त हुने अनुदान सहयोगकाे विषयमा तीव्र विराेध भएपछि सहमति खोज्न भन्दै प्रमुख सत्तारुढ दल नेकपाले ३ सदस्यीय अध्ययन कार्यदल बनाएकाे छ ।
आइतबार दिउँसो बसेको नेकपा सचिवालय बैठकले वरिष्ठ नेता झलनाथ खनालको संयोजकत्वमा ३ सदस्यीय कार्यदल बनाएकाे हाे ।
खनालकाे संयाेजकत्वमा गठित कार्यदलमा परराष्ट्रमन्त्रीसमेत रहेका नेता प्रदीप ज्ञवाली र भीम रावल सदस्य छन् । उक्त कार्यदल अनुमोदनका लागि नेकपाका अध्यक्ष पुष्पकमल दाहाल प्रचण्डले केन्द्रीय कमिटीमा प्रस्ताव गरेको केन्द्रीय सदस्य राजेन्द्र राईले जानकारी दिए । केन्द्रीय कमिटीको बैठक जारी रहेकै बेला त्यसलाई छलेर सचिवालयले कार्यदल बनाउने निर्णय गरेको हो ।
कार्यदलका सदस्यमध्ये नेता रावल एमसिसी पारित गर्नुनहुने पक्षमा छन् । उनले कुनै पनि हालतमा इन्डाेप्यासिफिक रणनीतिको हिस्सा बन्न नहुने तर्क गर्दै एमसिसीका प्रावधानहरुमाथि प्रश्न खडा गर्दै आएका छन् । यसैगरी मन्त्री ज्ञवालीले भने यसको प्रतिरक्षा गर्दै आएका छन् ।
१० दिनभित्र कार्यदलले अध्ययन गरी सचिवालयलाई प्रतिवेदन बुझाउने छ। कार्यदलले प्रतिवेदन बुझाएपछि त्यसैका आधारमा पार्टीले निर्णय लिने बताइएकाे छ ।
यसअघि आइतबार बसेकाे संसदको अन्तर्राष्ट्रिय सम्बन्ध समितिको बैठकमा बोल्दै नेता रावलले रावलले इन्डो प्यासिफिक स्ट्राटेजी रिपोर्ट र त्यसपछिका शृंखलाहरु अध्ययन गरेर बोल्न एमसिसी समर्थकहरुलाई सुझाव दिएका थिए । नेता रावलले भने एमसिसी इन्डोप्यासिफिककै अंग भएकाले पारित गरिए देशहित विपरीत हुने बताएका थिए ।
प्रकाशित मिति: आइतबार, माघ १९, २०७६ ०९:४७
