काठमाडाैं । प्रमुख प्रतिपक्षी दल नेपाली कांग्रेसको विद्यार्थी संगठन नेपाल विद्यार्थी संघ (नेविसंघ) को केन्द्रीय तदर्थ समिति गठन भएको छ ।
सुनसरीका राजीव ढुंगानाको अध्यक्षतामा तदर्थ समिति गठन भएको हो । पार्टीको २०७५ साल फागुन १ गतेको केन्द्रीय कार्यसमिति बैठकको निर्णयअनुसार पार्टी सभापति देउवाले ढुङ्गानालाई मनोनित गरेका हुन् । विसं २०४६ मा नेविसंघको जिल्ला सदस्यबाट नेविसंघको राजनीति सुरु गरेका ढुंगानाले यसअघि नेविसंघको केन्द्रीय सदस्य, कोषाध्यक्ष र उपाध्यक्षको जिम्मेवारी निर्वाह गरिसकेका छन् ।
यसैगरी संघकाे महामन्त्रीमा मनोज वैद्य र महेश्वरी कुँवरलाई नियुक्त गरिएको छ । साथै उक्त कार्यसमितिले अबको ६ महिनाभित्र १२औं केन्द्रीय अधिवेशन गर्नुपर्ने छ । वि.सं. २०७५ माघ २९ गतेबाट नेविसंघ विगठित थियाे ।
पौडेल र सिटौला पक्षले नाम नदिँदा तदर्थ समितिले भने पूर्णता पाएकाे छैन । यसअघि सभापति देउवा निवासमा बसेको कांग्रेस शीर्ष नेताहरुको बैठकमा सहमतिमा नेविसंघको तदर्थ समिति गठन गर्ने भनिए पनि संस्थापन पक्ष एक्लैले तदर्थ समिति गठन गरेको हो ।
कांग्रेसका सभापति शेरबहादुर देउवाले पार्टीको केन्द्रीय समितिको २०७५ फागुन १ गतेको बैठकको निर्णय र नेपाली कांग्रेसको विधान २०१७ (संशोधनसहित) को धारा ४२ (१) (च) बमोजिम नेपाल विद्यार्थी संघ केन्द्रीय तदर्थ कार्यसमिति गठन गरेको कांग्रेसले जनाएको छ ।
तदर्थ समिति गठनपछि मुख्यसचिव कृष्णप्रसाद पौडेलले जारी गरेको विज्ञप्तिमा तदर्थ समितिलाई ६ महिनाभित्र नेविसंघको १२औं महाधिवेशन जिम्मेवारी दिइएको उल्लेख छ ।
त्यस्तै समितिले आगामी १२ औं अधिवेशनसम्म नेपाल विद्यार्थी संघ केन्द्रीय कार्यसमितिले प्रयोग गर्ने विधान बमोजिमका काम, कर्तव्य र अधिकारको प्रयोग गर्न पाउने र तदर्थ कार्यसमितिमा रहेकाहरु आगामी केन्द्रीय अधिवेशनमा उम्मेदवार हुन नपाउने भएका छन् ।
प्रकाशित मिति: बिहीबार, माघ १६, २०७६ ०७:५६
