काठमाडौं । प्रधानमन्त्री केपी शर्मा ओलीले हालै भारतले जारी गरेको नक्सा तुरुन्त सच्याउन पत्रचार गरिसकेको बताएका छन् । राष्ट्रिय सभागृहमा बसिरहेकाे नेकपाको केन्द्रीय कमिटीको पूर्ण बैठकलाई सम्बोधन गर्दै ओलीले उक्त दाबी गरेका हुन् ।
लिम्पियाधुरा हाम्रो हो भनेर नेपालले यही सरकारको पालामा औपचारिक रुपमा भनेका हौं , उनले भने, त्यसभन्दाअघि लिम्पियाधुरा पनि हाम्रो हो भनेर कसैले भन्न सकेका थिएनन् ।
उनले सीमा विवाद रहेको स्पष्ट पार्दै भने, सीमा विवाद हाम्रो छ । तर कालापानी लिम्पियाधुरा र लिपुलेकमा छ । हामी वार्ताबाट भारतसँग कुरा गरेर समाधान गर्न सक्छौं । सरकारले बेवास्ता गर्छ कि भन्ने नठान्नुभए हुन्छ । यो सरकार देशभक्त र राष्ट्रवादी सरकार हो । सत्यका लागि बोल्न नडराउने सरकार हो ।
यसैगरी प्रधानमन्त्री ओलीले कोरोना भाइरसको नेपालमा ठूलो असर नभए पनि त्यसबाट सतर्कता भने अपनाउनुपर्ने बताएका छन् । उनले कोरानाबाट नेपाललाई ठूलो धक्का पर्न नदिने बताए ।
मंगलबार प्रतिनिधिसभामा सभाुखलाई बधाइ दिँदै प्रधानमन्त्री ओलीले २०२० को सुरुवातमै नेपाललाई प्रकृतिक रुपमा धक्का महसुस भएको बताएका थिए । उनी लगत्तै बोलेका प्रमुख प्रतिपक्षी दल नेपाली कांग्रेसका सभापति तथा संसदीय दलका नेता शेरबहादुर देउवाले के को धक्का भनी प्रश्न उठाएका थिए ।
बैठकलाई सम्बोधन गर्दै अध्यक्ष ओलीले त्यसको समेत जवाफ दिएका थिए । ‘भ्रमण वर्षका अवसरमा मैले हिजो कोरोेना भइरसले धक्का दिने हो कि भनेर बोलेको थिएँ । त्यो कसले कति बुझ्यो मलाई थाहा छैन’, उनले भने, ‘कहाँको धक्का भन्ने पनि कुरा गर्नुभयो । तर, हाम्रो सजगता छ भरसक ठूलो धक्का नहोस् ।’
प्रकाशित मिति: बुधबार, माघ १५, २०७६ ०७:३०
