काठमाडौँ । नेपाल कम्युनिस्ट पार्टी (नेकपा) की राष्ट्रियसभा सांसद कोमल वलीले नेपाल प्रहरीले अधिकारको दुरुपयोग गरी अनुसन्धानका नाममा गायिका आस्था राउतलाई कारबाही अगाडि बढाएको आरोप लगाएकी छिन् ।
मंगलबार बसेकाे राष्ट्रियसभाको बैठकको विशेष समयमा बाेल्दै उनले जिल्ला प्रशासन कार्यालय अर्धन्यायिक निकाय भएको हुँदा अनुसन्धान नै नगरी ४ दिन थुन्ने आदेश गर्नु गलत भएको टिप्पणी गरिन् ।
फौजदारी न्यायको सिद्धान्तले पहिले सुन्ने अनि थुन्ने भन्छ , सांसद वलीले भनिन्, गैरकानुनी कार्य गरेको छ कि भन्ने कुरा हेरिनुपर्छ, सामान्य भनाभनको विषय मात्र थियो ।बिनाअनुसन्धान प्रहरीले आफ्नो अधिकारको दुरुपयोग गरेको छ ।
नेपाली कांग्रेसका सांसद प्रकाश पन्थले छिमेकी देश चीनमा कोरोना भाइरस फैलिरहेको हुँदा विशेष सावधान अपनाउन सरकारको ध्यानाकर्षण गराए ।
नेकपाका सांसद बलराम बाँस्कोटाले वैज्ञानिक भूमि सुधार र भूमि व्यवस्थापन गर्ने नेकपाको चुनावी घोषणापत्रको कार्यान्वयन कहाँसम्म पुग्यो भनेर प्रश्न गरे । सोही पार्टीका सांसद कमलाकुमारी ओलीले उद्योग मन्त्रालयले ‘एक पालिका एक औद्योगिक ग्राम’को अवधारणा अगाडि बढाइरहेको अवस्थामा बढीभन्दा बढी महिलालाई सहभागी गराउन माग गरिन् ।
राष्ट्रिय जनता पार्टीका सांसद वृषेशचन्द्र लालले लोकतान्त्रिक संसदीय अभ्यासमा सरकार गम्भीर नभएको र संसदमा उठेका प्रश्नको उत्तर नदिएको आरोप लगाए ।
नेकपाका सांसद जीवन बुढाले स्थानीय सरकारसँग विकास गर्ने गुरुयोजना नभएको हुँदा संघीय र प्रदेश सरकारले सहयोग गर्नुपर्ने बताए ।
नेपाली कांग्रेसकी धनकुमारी खतिवडाले वार्षिक १० अर्ब रुपैयाँ कृषि अनुदानका लागि छुछ्याइएको भए पनि लक्षित साना किसानसम्म पुग्न नसकेकोप्रति सरकारको ध्यानाकर्षण गराइन् ।
प्रकाशित मिति: मंगलबार, माघ १४, २०७६ ०९:५४