काठमाडाैं । संघीय संसदअन्तर्गत प्रतिनिधिसभाका नवनिर्वाचित सभामुख अग्निप्रसाद सापकोटाले पद तथा गोपनीयताको शपथ लिएका छन् । राष्ट्रपति भवन शीतल निवासमा राष्ट्रपति विद्यादेवी भण्डारीले सापकोटालाई शपथ गराएकी हुन् ।
शीतल निवासमा आयोजित शपथ ग्रहण कार्यक्रममा उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रधानन्यायाधीश चोलेन्द्र शमशेर जबरा तथा राष्ट्रियसभाका अध्यक्ष गणेशप्रसाद तिमिल्सिना सहभागी थिए ।
सापकोटा आइतबार सभामुखमा निर्विरोध निर्वाचित भएका थिए । आइतवारको प्रतिनिधिसभा बैठकमा ज्येष्ठ सदस्य महन्थ ठाकुरले सापकोटा सभामुखमा निर्विरोध निर्वाचित भएको घोषणा गरेका थिए ।
यसैबीच, नवनिर्वाचित सभामुख सापकोटाविरुद्ध राष्ट्रपति कार्यालय अगाडि प्रदर्शनमा उत्रिएका अधिकारकर्मीलाई प्रहरीले पक्राउ गरेको छ ।
सभामुखकाे शपथ भइरहेका बेला अधिकारकर्मीले हत्या अभियोग लागेका व्यक्तिलाई सभामुख शपथ ग्रहण नगराउन माग गर्दै उनीहरूले प्रदर्शन गरेका थिए ।
पक्राउ पर्नेमा सापकोटाविरूद्ध मुद्दा लडिरहेकी पूर्णिमाया लामा, चरण प्रसाईं, महामुनिश्वर आचार्य, जनक राउत, एलिना गौतम, निरन्जन थपलिया छन् । त्यस्तै विपिन बुढाथोकी, शंकर बुढाथोकी, बालकृष्ण गजमेर,जेसिलिन राना, प्रशान्त त्रिपाठी र राजन कुइँकेललाई पनि प्रहरीले पक्राउ गरेको छ ।
प्रकाशित मिति: सोमबार, माघ १३, २०७६ ०६:४१
