जाजरकोट । परिवारका ११ सदस्य गुमाएका नवनिर्वाचित राष्ट्रियसभा सदस्य मायाप्रसाद शर्मा गहभरि आँसु लिएर शनिबार बिहानै सुर्खेतबाट जाजरकोट पुगे । सदरमुकाममा पार्टी कार्यकर्ताको फूलमालासमेत ग्राहण नगरी हतार-हतार भेरी नगरपालिका १, रिम्नास्थित सहिद स्मृति भवनमा पुगेर सहिदका तस्बिर साक्षी राखी मुट्ठी कसेर ‘तपाईंहरुको सपना मेरो मूलबाटो हो’ भन्दै कार्यकर्तासामु उपस्थित भए ।
सदरमुकाम खलङ्गामा कार्यकर्ताको टीका र मालासमेत ग्रहण नगरी रिम्ना पुगेका शर्माले सहिदको तस्बिरमा माल्यार्पण गरेर मात्र समर्थक, कार्यकर्ताको टीका तथा माला ग्राहण गरेका थिए । भेरी १ मा मात्र जनयुद्धको समयमा ३५ जनाले ज्यान गुमाएका थिए । एकै वडाबाट दुई दर्जनभन्दा बढी मानिसको मृत्यु भएको नेपालकै पहिलो बस्ती रिम्ना र पिपे हो । जनयुद्धको समयमा जाजरकोटकमा ३ सयभन्दा बढीले ज्यान गुमाएका थिए ।
सबै ज्यान गुमाएका सहिदको तस्बिर रिम्नास्थित सहिद स्मृति भवनमा राखिएको छ । सहिद सम्झँदै रिम्ना पुगेका शर्माले एकै परिवारका सात आफन्त गुमाएकी ८२ वर्षीया अमृता खड्कासँग भेट गरी सहिदको बाटो नभुल्ने प्रतिबद्धता व्यक्त गरे । खड्काले शर्मालाई भने, मेरो आफन्तले देखाएको बाटो र बाँकी कार्यभार पूरा गर्नु, मेरो अन्तिम इच्छा यही हो ।
उनका यी वाक्य फुट्न नपाउँदै शर्माले गहभरि आँसु झार्दै भने, मेरा आफन्त, हजुरका आफन्त सबैले लिएको बाटोमा लाग्ने र सफल बनाउने हजुरको चाहना अधुरो हुन दिन्नँ, मेरो सास रहुन्जेलसम्म सहिदकै बाटोमा लाग्नेछु । नेपाल कम्युनिस्ट पार्टी (नेकपा) का कर्णाली प्रदेशका सचिवसमेत रहेका शर्माले नेपालकै पहिलो जनयुद्धका सहिद मानबहादुर ओली र मानवबहादुर रावल भए पनि त्यतिबेला सूचना र सञ्चारको अभावले छुटेका बताए ।
के चाहन्छन् रिम्ना–पिपेवासी ?
जनयुद्धमा ३५ आफन्त गुमाएका भेरी १, रिम्ना र पिपेका स्थानीयले सहिदको सपना पूरा गर्न आग्रह गरेका छन् । आफू बाँचेर मात्र हुँदैन, देश बचाउनु पहिलो सर्त भएको भन्दै रिम्नाका जयबहादुर रानाले भने, देशमा हाम्रा आफन्तले गरेको बलिदानी खेर नजाओस्, हाम्रो पहिलो माग त्यही हो, कसैको माया र दयाले यो परिवर्तन आएको होइन, हाम्रा आफन्तको रगतको खोला बगेको छ ।
जनयुद्धको समयमा बडालेखमा ४ सयभन्दा बढी स्थानीयको घरमा हेलिकोप्टरबाट बम हान्दा बस्ती खरानी भएको थियो । शान्ति स्थापनासँगै रिम्ना र पिपेलाई नमुना बस्ती बनाउने भन्दै तत्कालीन शान्ति तथा पुनर्निर्माणमन्त्री सत्या पहाडीकै पहलमा शान्तिका लागि द्वन्द्वरत कार्यक्रममार्फत विद्युत्, खानेपानी र अन्य आधारभूत सेवा उपलब्ध गराउने योजना बनाइएको थियो । अहिले यहाँका स्थानीयको माग द्वन्द्वको घाउ मेट्न विकास र समृद्धि आवश्यक रहेको नेकपाका वडाध्यक्ष ढकवीर रानाले बताए । -रासस
प्रकाशित मिति: आइतबार, माघ १२, २०७६ ०७:००
