काठमाडाैं । नेपाल एअरलाइन्सका २५ जना पाइलटले सामूहिक राजीनामा दिएका छन् ।
विदेशी र नेपाली पाइलटबीच सेवा सुविधामा चरम विभेद गरिएको भन्दै उनीहरुले ३ महिनाको समय दिएर व्यवस्थापन समक्ष राजीनामा पत्र बुझाएका हुन् । व्यवस्थापनको काममा नेपाली स्थायी कर्मचारी बढी खटिनुपर्ने भए पनि बढी सेवा सुविधा विदेशी पाइलटलाई दिइएको उनीहरुको आरोप छ ।
उनीहरुले ३ महिनामा नेपाली पाइलटलाई तालिम दिएर सबै विदेशी पाइलट विस्थापन गर्ने वा नेपाली पाइलटले दिएको राजीनामा स्वीकृत गरेर सबैलाई करारमै काम चलाउन विकल्प दिएका छन् ।
३ महिनाभित्र नेपाली र विदेशी पाइलटबीचको विभेद अन्त्य नगरे आफूहरु काममा नआउने भन्दै उनीहरुले राजीनामा पत्रमा लेखेका छन् । नेपाल एअरलाइन्समा पाइलटहरुले लामो समयदेखि असन्तुष्टि व्यक्त गर्दै आएका थिए ।
पाइलटहरूका अनुसार विदेशीले महिनामा ४६ घन्टा मात्र जहाज उडाउँछन् भने हप्तामा २ दिन छुट्टी पाउँछन् । तलब भने उनीहरूले १५ लाख पाउँछन् त्यसमाथि कर पनि व्यवस्थापनले तिरिदिन्छ ।
तर नेपाली स्थायी पाइलटले महिनामा ९५ घन्टा जहाज उडाउने तर हप्तामा बिदा १ दिन मात्र पाउने गरेका छन् । नेपाली पाइलटले तलब भने बढीमा २ लाख रुपैयाँ मात्र पाउँछन् । नेपाली पाइलटले कर आफैंले तिर्दै आएका छन् ।
अन्तर्राष्ट्रिय उडान भर्ने पाइलटमा ४० जना नेपाली छन् भने विदेशी १५ जना छन् । ४० जनामध्ये २५ जनाले बिहीबार सामूहिक राजीनामा दिएका हुन् । अन्य नेपाली पाइलटले पनि राजीनामा दिने तयारी गरेको बताइएकाे छ ।
प्रकाशित मिति: शुक्रबार, माघ १०, २०७६ ०६:००