काठमाडौं । नेपाली कांग्रेसको १४औँ महाधिवेशनको तयारी र आन्तरिक विषयमा पार्टीका शीर्ष नेताहरुले आपसी छलफललाई तीव्रता दिएका छन् । साेही क्रममा अहिले नेपाली कांग्रेसका शीर्ष नेताहरूको बैठक बसिरहेको छ ।
पार्टी सभापति शेरबहादुर देउवाको निवास बूढानीलकण्ठमा बसेको बैठकलाई गत बुधबार भएको छलफलकै निरन्तरता भएकाे बताइएकाे छ । आजको बैठकमा सभापति देउवा, वरिष्ठ नेता रामचन्द्र पौडेल, महामन्त्री पूर्णबहादुर खड्का, उपसभापति निधि, महामन्त्री डा शशाङ्क कोइराला, नेताहरु सिंह र सिटौलालगायत नेताहरुको उपस्थिति रहेकाे बताइएकाे छ ।
बैठकमा संस्थापनइतर समूहले १४औं महाधिवेशनको सुनिश्चितता खोज्ने छन् । सभापति देउवाले बोलाएको शीर्ष नेताहरूको बैठकमा राखिने अडानका लागि पौडेल समूहले बिहीबार अनौपचारिक छलफल गरेको थियो । महामन्त्री कोइराला निवास महारागन्जमा बसेको हिजोको बैठकले १४औं महाधिवेशन ‘स्वतन्त्र र निष्पक्ष’ हुनुपर्ने अडान लिएको छ ।
पार्टी संस्थापन पक्षले आफू खुसी मनोमानी ढंगले क्रियाशील सदस्यता वितरण गर्ने तयारी गरेको भन्दै असन्तुष्ट समूहले आपत्ति जनाएको छ । उनीहरुले क्रियाशील सदस्यता छानबिनका लागि विशेष समिति गठनको मागसमेत गरेका छन् ।
गत पुस ११ गते केन्द्रीय समितिले पारित गरेको महाधिवेशनको कार्यतालिका हेरफेर गर्नुपर्ने पौडेल समूहको माग छ । पौडेल समूहले बहिष्कार गरेको उक्त बैठकले एकपक्षीाय रुपले महाधिवेशनको कार्यतालिका एवं पार्टीमा विभागहरु थप्ने प्रस्ताव पास गरेको थियो ।
प्रकाशित मिति: शुक्रबार, माघ १०, २०७६ ०५:४९
