काठमाडौँ । सत्तारूढ दल नेपाल कम्युनिस्ट पार्टी (नेकपा) का तर्फबाट सांसद अग्नि सापकोटाले सभामुखमा उम्मेदवारी दर्ता गराएका छन् ।
नेकपा संसदीय दलका उपनेता सुवास नेम्वाङ प्रस्तावक, नेकपाका सांसद देव गुरूङ, ओनसरी घर्तीमगर र राजपाका सांसद लक्ष्मणलाल कर्णको समर्थनमा संघीय संसद भवनकाे ल्होत्से हलमा सापकोटाले उम्मेदवारी दर्ता गराएका हुन् ।
सभामुख पदमा प्रमुख प्रतिपक्षी नेपाली कांग्रेसले भने उम्मेदवारी नदिने भएको छ । मंगलबार बिहान बसेको कांग्रेस संसदीय दलको कार्यसमितिको बैठकले सभामुखका लागि उम्मदवारी नदिने निर्णय गरेको हो ।
प्रतिनिधिसभाको रिक्त सभामुख पदको निर्वाचनका लागि संसद सचिवालयले सार्वजनिक गरेको तालिकाअनुसार मंगलबार बिहान ११ देखि २ बजेसम्म उम्मेदवारी दर्ताको समय तोकिएको छ ।
आजै साढे २ बजे उम्मेदवारीको दर्ता क्रम अनुसार सूची प्रकाशन गर्ने र माघ १२ गते निर्वाचन गर्ने कार्यतालिकामा उल्लेख छ ।
तर प्रमुख प्रतिपक्षी दल कांग्रेसले उम्मेदवारी नदिने भएपछि सभामुखमा सापकाेटा एक्ला उम्मेदवार भएका छन् । यससँगै सभामुखमा सापकाेटा सर्वसम्मत निर्वाचित हुने भएका हुन् ।
यसैबीच, सभामुखमा नेकपालाई सघाउन तयार भएपछि उपसभामुख राजपाले पाउने सम्भावना बढेकाे छ । सभामुखमा नेकपाका सापकाेटाकाे समर्थकमा राजपा सांसद लक्ष्मणलाल कर्णसमेत रहेर उम्मेदवारी दर्ता भएपछि उपसभामुख राजपाले पाउने आशंका गरिएकाे हाे ।
राष्ट्रियसभा निर्वाचनका लागिसमेत राजपा र नेकपाले सहकार्य गरेका छन् । याे सहकार्यले सभामुख चयनमा पनि निरन्तरता पाएकाे हाे । साेही कारण पनि उपसभामुख राजपाकाे भागमा जान सक्ने आँकलन गर्न सकिन्छ ।
प्रकाशित मिति: मंगलबार, माघ ७, २०७६ ०६:४४
