काठमाडौं । सभामुखको उम्मेदवार टुंगो लगाउन प्रधानमन्त्री निवास बालुवाटारमा नेकपा सचिवालय बैठक जारी छ ।
यसअघि पार्टी अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीच छलफलपछि सभामुखकाे विषयमा छलफल भएकाे थियाे ।
आइतबार बिहान भएकाे छलफल क्रममा सभामुख पूर्वमाओवादी पक्षलाई दिने सहमति भएकाे थियाे । सभामुखका लागि अग्नि सापकोटाको नाममा दुवै अध्यक्षबीच सहमति बनेको जानकारी प्राप्त भएकाे छ । सचिवालय बैठकले सापकाेटाकाे नाम अनुमाेदन गर्ने बताइएकाे छ ।
बालुवाटारमा भएकाे वार्तापछि अध्यक्ष प्रचण्डले पार्टीका वरिष्ठ नेता झलनाथ खनाल, माधव नेपाल, वामदेव गौतम, नारायणकाजी श्रेष्ठलगायतसँग समेत छलफल गरेका थिए ।
सभामुख चयनमा पार्टीभित्रको आन्तरिक किचलोका कारण एक महिनादेखि संसद अवरुद्ध छ । पार्टी सचिवालयले सभामुखको टुंगो लगाएपछि साेमबार बस्ने प्रतिनिधसभा बैठकमा सभामुख निर्वाचनसम्बन्धी कार्यक्रम पेस गर्ने तयारी छ ।
नेकपाभित्र सभामुख बारे सहमति जुटन नसक्दा संसद्को हिउँदे अधिवशेन पुस ४ गते प्रारम्भ भए पनि नेकपाले सभामुख उम्मेदवार चयन गर्न नसकेका कारण संसदको बैठक पटकपटक सूचना टाँसेर स्थगित हुँदै आएकाे छ ।
प्रकाशित मिति: आइतबार, माघ ५, २०७६ ११:३७
