काठमाडौं । सत्तारुढ दल नेपाल कम्युनिस्ट पार्टी (नेकपा) अध्यक्षद्वय केपी शर्मा ओली र पुष्पकमल दाहालबीच सभामुख उम्मेदवारको विषयमा छलफल भएको छ।
सभामुख चयनका लागि सहमति कायम गर्न प्रधानमन्त्री ओलीसँग परामर्शका लागि अध्यक्ष दाहाल बालुवाटार पुगेका थिए । २ अध्यक्षबीच प्रधानमन्त्री निवास बालुवाटारमा आइतबार बिहान झन्डै २ घन्टाभन्दा बढी छलफल भएको थियो ।
२ अध्यक्षबीचको छलफलपछि आइतबार अपराह्न ४ बजेलाई सचिवालय बैठक बोलाइएको नेकपाका महासचिव विष्णु पौडेलले जानकारी दिए । ‘समसामयिक विषयमा छलफल र निर्णय गर्न सचिवालय बैठक बोलाइएको हो,’ महासचिव पौडेलले बताए ।
भोलि अर्थात् पुस ६ गतेका लागि प्रतिनिधिसभाको बैठक बाेलाइएकाले सभामुखका उम्मेदवार आजसम्म टुंग्याइसक्नुपर्ने दबाब नेकपालाई छ । नेकपाले सभामुख उम्मेदवार चयन गर्न नसकेका कारण प्रतिनिधिसभा बैठक पटक-पटक सूचना टाँसेर बैठक स्थगित हुँदै आएको छ ।
पुस ४ गते संसदको हिउँदे अधिवेशन सुरु भए पनि सभामुख चयनमा सहमति हुन नसक्दा संसद अवरूद्ध हुँदै आएको छ ।
प्रकाशित मिति: आइतबार, माघ ५, २०७६ ०६:५२