काठमाडौं । नेपाल सरकारका प्रवक्ता सञ्चार तथा सूचना प्रविधिमन्त्री गोकुलप्रसाद बास्कोटाले भीम रावललाई बालुवाटारबाट ज्यान मार्ने धम्की आएको कुरामा सत्यता नभएकाे बताएका छन् ।
पुस २८ गते बसेको मन्त्रिपरिषद् बैठकका निर्णय बिहीबार सार्वजनिक गर्दै प्रवक्ता बाँस्कोटाले बालुवाटारबाट त्यस्तो धम्की दिएको कुरामा विश्वास नगर्न आग्रह गरे ।
‘यो धम्की आएको भन्ने तपाईंलाई पत्यार लाग्छ? प्रधानमन्त्री त्यस्तो खालको हुनुहुन्छ र ? कसैको ज्यान लिने?,’ उनले भने, ‘ज्यान मार्ने धम्कीको सत्यता छैन । उहाँले पनि याे नम्बरबाट यसकाे फोन आयो भनेर भन्नुपर्छ । यदि त्यस्तो भएके रहेछ भने कारबाही हुन्छ।’
उनले विचारमाथि सहमति, असहमति राख्दैमा कसैको ज्यानै लिने धम्की दिन नमिल्नै बताउँदै बालुवाटारबाट धम्की आएको भन्ने कुरा पत्याउन नसकिने बताए । प्रधानमन्त्री पनि नेकपाकै र भीम रावल नेकपाकै नेता भएको बताउँदै उनलाई सरकारले पछुवा गाडीसहित सुरक्षाकर्मी उपलब्ध गराइरहेको स्मरण गराए । प्रधानमन्त्रीले आफ्नो कार्यकर्ता मार्न तरबार बोकेर र गोली भिरेर हिँड्नुहुन्छ भन्ने कुरामा कुनै सत्यता छैन , उनले भने ।
यसैगरी अर्काे प्रसंगमा मन्त्री बाँस्कोटाले बालुवाटारमा विप्लव समूहले झण्डा गाड्दैमा जग्गा कब्जा नहुने बताएका छन् । बुधबार साँझ सरकारद्वारा प्रतिबन्धित नेत्रविक्रम चन्द विप्लव नेतृत्वको नेकपाले विवादित लतिला निवासको जग्गामा बम राख्नुका साथै झण्डा गाडेर कब्जा गरेको घोषणा गरेको थियो । त्यही सन्दर्भमा पत्रकारले सोधेको प्रश्नको जवाफ दिँदै मन्त्री बाँस्कोटाले यस्तो बताएका हुन् ।
‘नेपाल सरकारले त्यस जग्गामाथि छानबिन गरिरहेको छ’, मन्त्री बाँस्कोटाले भने, ‘यो जग्गा कसैले कब्जा गर्दैमा, झण्डा गाड्दैमा कब्जा हुँदैन ।’ उनले विप्लव समूहले चर्चामा आउनका लागि जग्गा कब्जाको हल्ला गरेको बताए। लुकेर आक्रमण गरे नेत्रविक्रम चन्द ‘विप्लव’ नेतृत्वको समूहका लागि राम्रो नहुने चेतावनीसमेत उनले दिए ।
प्रकाशित मिति: बिहीबार, माघ २, २०७६ १०:०५
