काठमाडौं । सभामुखको उमेदवार टुंगो लगाउन भन्दै नेकपाका २ अध्यक्ष बिहीबार बालुवाटारमा छलफल गरे पनि कुनै निष्कर्ष भने निस्कन सकेन ।
प्रधानमन्त्रीसमेत रहेका नेकपाका अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’बीच सभामुखमा सहमति खोज्न भन्दै बिहीबार छलफल भएको थियाे ।
प्रधानमन्त्री निवास बालुवाटारमा भएको भेटवार्तामा सभामुखको उम्मेद्वारमा सहमति खोज्ने प्रयास भएको स्रोतको दाबी छ । ओलीले प्रचण्डलाई आगामी आइतबारको संसद बैठक प्रभावित नहुने गरी त्यसअघि नै सभामुखमा सहमति गर्ने तयारी थाल्न सुझाएका थिए ।
ओलीको कुरामा सहमति जनाउँदै प्रचण्डले पूर्वमाओवादीलाई नै सभामुख दिने भए १ घण्टामै उम्मेद्वार छान्ने बताएका थिए । ‘मलाई साथीहरुले सभामुख नछोड्न धेरै दबाब दिइरहनुभएको छ । माफ गर्नुहोला, यस विषयमा मैले तपाईंलाई सहयोग गर्न सकिनँ’, प्रचण्डको भनाई उद्धृत गर्दै स्रोतले भन्यो ।
प्रचण्डले सभामुख नछोड्ने संकेत गरेपछि ओलीले तपाईले छानेको उम्मेद्वारमा पनि पार्टीका अन्य साथीहरुको सहमति त हुनुपर्यो नि भन्ने प्रश्न गरेका थिए । ‘सरकार मैले चलाउने हो, सभामुख पनि मलाई नै छान्न दिनुभए काम गर्न सहज हुनेथियो । तपाई कुरा बुझेर पनि नबुझे झै गर्नुहुन्छ’ ओलीको भनाइ उद्धृत गर्दै स्रोतले भन्यो ।
उपसभामुख शिवमाया तुम्बाहाङ्फेले राजीनामा दिन आनाकानी गरेको विषयमा पनि प्रचण्डले ओलीसँग कुरा गरेका थिए । ‘कसकाे आडमा शिवमायाजी राजीनामा दिन्न भनिरहनुभएको छ ? तपाईंले उचाल्नुभएको त हैन नि ?’ प्रचण्डले प्रश्न गरेका थिए ।
शीतल निवासको चाहनाबमोजिम शिवमायाले राजीनामा नदिएको हुनसक्ने भन्दै ओलीले पार्टीले उम्मेद्वार खडा गरेपछि उनी बाधक नहुने आशय व्यक्त गरेका थिए ।
अमेरिकी वैदेशिक सहायता नियोग मिलेनियम च्यालेन्ज कम्प्याक्ट (एमसीसी) अनुमोदन गर्ने विषय पेचिलो बन्दै जाँदा यसैले सभामुखको उमेदवार चयन रोकेको नेकपा स्रोतको दाबी छ । पूर्वमाओवादी केन्द्रका देव गुरुङ, लीलामणि पोखरेल, हरिबोल गजुरेललगायत नेताहरू एमसीसी पास गर्न नहुने पक्षमा रहेकाले पनि सभामुख प्रकरणको गाँठो फुक्न नसकेको बताइएको छ ।
पार्टी एकताअघि कै भागबन्डा कायम हुनुपर्ने तर्क गर्दै पूर्वमाओवादी केन्द्रले सभामुखको अडान छाडेको छैन ।
प्रकाशित मिति: बिहीबार, माघ २, २०७६ ०९:३२