इलाम । भौतिक पूर्वाधार तथा यातायात मन्त्री वसन्तकुमार नेम्वाङले इलामको खत्रक्पा र फुलुङगी क्षेत्रलाई धार्मिक तथा साँस्कृतिक पर्यटकीय स्थलका रुपमा विकास गर्ने बताएका छन् ।
बुधबार किरात माङ्हिम शिलान्यासतथा किरातीहरुको महान पर्व कक्फेवा तङनाम माघेसक्रान्ति सत्यहाङमा शान्ति मकरमेला समापन समारोहलाई सम्बोधन गदैै मन्त्री नेम्वाङले यस्तो बताएका हुन् ।
मन्त्री नेम्वाङले राष्ट्रिय विभूति महागुरु फाल्गुनन्द र वर्तमान गुरु आत्मनन्दले ज्ञान प्राप्त गर्नु भएका खत्रक्पा र फुलुङगी ऐतिहासिक भूमि रहेको बताए । उनले भने, ‘यो ऐतिहासिक भूमि पवित्र छ । राष्ट्रिय विभूति महागुरु फाल्गुनन्द ज्यूले ज्ञान प्रप्त गर्नु भएको पवित्र भूमि यही हो ।’ उनले थपे, ‘वर्तमान किरात धर्मगुरु आत्मानन्द लिङदेन ‘सेईङ’ ज्यूले ज्ञान प्रप्त गर्नु भएको पवित्र भूमि पनि यही हो ।’
उनले राष्ट्रिय विभूति महागुरु फाल्गुनन्द लिङ्देन र वर्तमान किरात धर्मगुरु लिङ्देन आत्मानन्द सेइङले कठोर तपस्या गरेर प्राप्त गरेका ज्ञान र शक्तिलाई विश्व मानव हितका लागि उपयोग गर्नुपर्ने धारण राखे ।
विश्व शान्ति र मानव एकताको कामना गर्दै २ लाख १७ हजार २ सय १६ बत्ती प्रज्वलन गरेका नेम्वाङले यो अवसर जुरेकोमा आफुलाई भाग्यमानी ठानेको बताए । उनले भने, ‘धेरै पहिलेदेखि यस ठाउँमा आउन चाहेको तर आउन नसकेको यसपटक भने आयोजकको निमण्त्रणाले इच्छा पुरा भएको छ ।’
यस क्षेत्रको चौतर्फी विकासका लागिमाङसेबुङदेखि फुलुङगी, खत्रक्पा, राँके हुँदै किरातीहरुको धार्मिक तिर्थस्थल फक्तालुङसम्म मोेटरबाटो निर्माणको काम समेत अघि बढाइएकोे मन्त्री नेम्वाङले जानकारी दिए ।
कार्यक्रममा किरात धर्मगुरु मुहिङगुम अङसीमाङ लिङदेन ‘सेईङ’ तथा गुरुआमा साँवा पवित्रहाङमा लिङ्देन, पूर्व राज्यमन्त्री बेनुप प्रसाईं, प्रतिनिधि सभाका सांसद एलपी साँवा र स्थानीय तह प्रतिनिधिहरुका समेत उपस्थिति थियो ।
मन्त्री नेम्वाङले बुधबार नै माई खोलामा निर्माणका अन्तिम चरणमा रहेको ५ सय ७५ मिटर लामो पक्की पुलको समेत निरीक्षण गरेका छन् ।
प्रकाशित मिति: बिहीबार, माघ २, २०७६ ०५:४६
