काठमाडौं । नेपाल कम्युनिस्ट पार्टी (नेकपा) को सचिवालय समितिले ३ नम्बर प्रदेशकाे नाम बागमती प्रस्ताव गर्न दिएकाे निर्देशनकाे विराेधमा माइतीघरमा प्रदर्शन भएको छ।
बागमती नामले प्रदेश ३ को पहिचानलाई सम्बोधन नगर्ने भन्दै विभिन्न नेवार संघ संगठन, नेपाल आदिवासी जनजाति महासंघ लगायतले संयुक्त रुपमा विरोध कार्यक्रम गरेका हुन् ।
उनीहरुले प्रदेश नम्बर ३ को नाम बागमती राखिनुले सरकार पञ्चायतकालीन युगतर्फ अघि बढिरहेको भन्दै विरोध गरेका हुन् । प्रदेश नम्बर ३ को नाम यहाँको ऐतिहासिक सांस्कृतिक पहिचानलाई समेटने गरी ’नेवा ताम्सालिङ’ राख्न उनीहरुले माग गरेका छन्।
प्रदर्शनकारीले नेकपा सचिवालयले प्रदेशको अधिकार मिचेको भन्दै बागमती प्रदेश आफूहरुलाई मान्य नहुने बताए ।
नेकपा सचिवालयले प्रदेश ३ को राजधानी हेटौंडा नै कायम गर्ने निर्णय गरेको थियो। तर प्रदेश सांसदहरुले भने केन्द्रले प्रदेशको अधिकारमाथि हस्तक्षेप गरेको आरोप लगाएका छन्।
नेकपाकै प्रदेश सांसदहरु बागमती नाम र हेटौंडालाई राजधानी मान्न तयार छैनन् । उपत्यकाका सांसदहरू प्रदेश ३ को नाम नेपाल मण्डल राख्नुपर्ने अडानमा छन्।
प्रकाशित मिति: सोमबार, पुस २१, २०७६ ०९:२३