चितवन । स्थानीय तहको निर्वाचन सम्पन्न भएको २ वर्ष बितिसक्दा पनि जिल्लाका स्थानीय तहका उम्मेदवारले खर्चको विवरण बुझाएका छैनन् ।
जिल्लाका ७ स्थानीय तहका ९ सय १७ जनाले निर्वाचन कार्यालयमा खर्चको विवरण नबुझाएका हुन् । जिल्ला निर्वाचन अधिकारी हरि ढकालका अनुसार जिल्लाका ७ स्थानीय तहमा २ हजार २ सय ३ उम्मेदवार थिए । तीमध्ये १ हजार २ सय ८६ जनाले मात्र खर्चको विवरण बुझाएको उनले जानकारी दिए ।
यस्तै प्रतिनिधिसभा र प्रदेशसभाका १२-१२ जनाले पनि खर्च विवरण नबुझाएको कार्यालयले जनाएको छ । साना राजनीतिक दलका र स्वतन्त्र उम्मेदवारले खर्चको विवरण नबुझाएका हुन् ।
उनीहरुलाई कार्यालयले ताकेता गरिरहेको भए पनि विवरण बुझाइनसकेको ढकालले बताए । निर्वाचन सम्पन्न भएको ३० दिनभित्र उम्मेदवारले खर्च विवरण बुझाउनुपर्ने हुन्छ ।
सात जनाको धरौटी जफत
उपनिर्वाचनमा जिल्लाका ३ वडाध्यक्षका लागि उम्मेदवार बनेका ७ उम्मेदवारको धरौटी जफत भएको छ । भरतपुर महानगरपालिका वडा नम्बर १६, खैरहनी नगरपालिकाको वडा नम्बर ४ र ५ मा १३ जना उम्मेदवार थिए ।
तीमध्ये ७ जनाले सदरमतको १० प्रतिशत मत ल्याउन नसकेपछि धरौटी जफत भएको हो । ३ वटै वडामा नेपाली कांग्रेसले जितेकाे छ ।
प्रकाशित मिति: बुधबार, मंसिर २५, २०७६ ०८:४२
