काठमाडौं । मन्त्रिमण्डल हेरफेरबारे प्रधानमन्त्री केपी शर्मा ओली र अध्यक्ष पुष्पकमल दाहालले राष्ट्रपति विद्या भण्डारीसँग भेटवार्ता गरी परामर्श गरेका छन् ।
अध्यक्षद्वयले मन्त्री हेरफेरको टुंगो लगाएर बुधबार अपरान्ह राष्ट्रपतिसँग भेटवार्ता गर्न गएका थिए । राष्ट्रपतिलाई भेटेर आएपछि नेकपाकाे सचिवालय बैठक बस्ने छ । सचिवालय बैठकले निर्णय गरेर आजै अपराह्न ४ नवनियुक्त मन्त्रीहरुकाे शपथ गराउने तयारी छ ।
प्रधानमन्त्री ओली र अध्यक्ष दाहालले राष्ट्रपति भण्डारीसँग छलफल गरी सपथग्रहणको समय तय गरेको बुझिएको छ । नेकपाको सचिवालय बैठकले केही मन्त्रीलाई फिर्ता बोलाउने र ती मन्त्रालयमा नयाँ मन्त्री पठाउने साथै बहालवाला मन्त्रीकाे पनि मन्त्रालय हेरफेर गर्ने बताइएकाे छ ।
सञ्चार मन्त्री गोकुल बाँस्कोटालाई भौतिक पूर्वाधार मन्त्रालय दिने तयारी गरिएकाे छ भने अहिलेका भौतिक पूर्वाधारमन्त्री रघुवीर महासेठ हटाउने सूचीमा छन् । खानेपानी मन्त्री बीना मगरलाई पनि महिला, बालबालिका वा युवा तथा खेलकुद मन्त्रालय पठाउने बुझिएकाे छ ।
यसैगरी महिला मन्त्री थममाया थापा पनि हटाउनेकाे सूचीमा छिन् । उद्योग मन्त्री मातृका यादव, कृषिमन्त्री चक्रपाणि खनाल, भूमिसुधारमन्त्री पद्मा अर्याल पनि हट्ने छन् ।यस्तै कृषि राज्यमन्त्री रामकुमारी चौधरी र पर्यटन राज्यमन्त्री धनबहादुर बुढा पनि हटाइने सूचीमा परेका छन् ।
राज्य व्यवस्था समितिको बैठक स्थगित
प्रतिनिधिसभा अन्तर्गतको राज्य व्यवस्था तथा सुशासन समितिको बैठक स्थगित भएको छ । बुधबार बिहानका लागि बोलाइएको बैठक विशेष कारणले स्थगित भएको समितिका सभापति शशि श्रेष्ठले जानकारी दिइन् ।
आज मन्त्रिमण्डल पुनर्गठन हुने भएकाले सामान्य प्रशासन मन्त्री लालबाबु पण्डित बैठकमा उपस्थित नभएपछि बैठक सथगित भएकाे हाे ।
आजकाे बैठकमा संघीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयकको मस्यौदा प्रतिवेदनमा छलफल गर्ने कार्यसूची थियो ।
प्रकाशित मिति: बुधबार, मंसिर ४, २०७६ ०७:१५