भक्तपुर । देशलाई समृद्ध बनाउन नेकपाबाहेक अन्य कुनै विकल्प नभएको नेकपाका सचिवालय सदस्य नारायणकाजी श्रेष्ठले बताएका छन् । उनले शिक्षा, स्वास्थ्य, रोजगारको साथमा समृद्ध भक्तपुर र सुखी भक्तपुरका जनता बनाउन नेकपाको अर्को विकल्प नभएको बताए ।
मंसिर १४ गते हुने उपनिर्वाचनमा भक्तपुर निर्वाचन क्षेत्र नम्बर १ (क) का नेकपा उम्मेदवार डिपी ढकाललाई भोट माग्न जनताको घरदैलोमा पुगेका नेता श्रेष्ठले देशलाई समृद्ध बनाउने अभियान स्वरुप भक्तपुरको विकास गर्न र यहाँको मुहार फेर्न ढकाललाई विजयी गराउनुपर्ने आवश्यकता औँल्याए ।
नेकपाका प्रवक्तासमेत रहेका श्रेष्ठले राष्ट्रिय स्वाधीनता र भौगोलिक अखण्डताको रक्षाका लागि पनि नेकपालाई चुनावमा जिताउनैपर्ने बताए । उम्मेदवार ढकाललाई जिताउन मतदातासँग आग्रह गर्दै श्रेष्ठले भने, ‘नेपालको कालापानीलगायतको मिचिएको भूभाग नेकपाले मात्र फिर्ता गराउन सक्छ ।’ नेकपाको सरकारले स्पष्ट रुपमा कालापानी, लिपुलेक, लिम्पियाधुरा हाम्रो हो भनेर स्पष्ट पारेको उनले दाबी गरे ।
घरदैलो कार्यक्रममा प्रतिनिधिसभा सांसद महेश बस्नेतले भक्तपुरले रोजेको व्यक्ति डिपी ढकाल नै भएको उल्लेख गर्दै भक्तपुरको विकास र समृद्धि तथा जनताको चाहना, आवश्यकतालाई पूरा गर्न ढकालसँगै आफू लाग्ने प्रतिबद्धता व्यक्त गरे ।
चुनावी कार्यक्रममा नेकपा प्रवक्ता श्रेष्ठसहित सांसद् बस्नेत, नेकपाका केन्द्रीय सदस्य एवम् प्रदेश सांसद् रामेश्वर फुयाल, जिल्ला इन्चार्ज दिलीप प्रजापति, चाँगुनारायण नगरपालिकाका मेयर सोम मिश्र, जिल्ला अध्यक्ष वचन देउजालगायतको सहभागिता थियोे ।
प्रकाशित मिति: आइतबार, मंसिर १, २०७६ ०९:३५
