काठमाडाैं । प्रधानमन्त्री केपी शर्मा ओलीले भारतबाट अतिक्रमित भूमि फिर्ता ल्याएरै छाड्ने प्रतिबद्धता व्यक्त गरेका छन् ।
सत्तारूढ दल नेपाल कम्युनिस्ट पार्टी (नेकपा) निकट राष्ट्रिय युवा संघको राष्ट्रिय भेलालाई आइतवार राजधानीमा सम्बोधन गर्दै प्रधानमन्त्री ओलीले मिचिएको भूमि फिर्ता ल्याउने प्रतिबद्धता व्यक्त गरेका हुन् । ओलीले नेपाली भूभाग कालापानीबाट भारतीय सेना हटाएरै छाड्ने चेतावनी पनि दिए ।
पहिले राष्ट्रियताको पक्षमा सरकार अडिदिए हुन्थ्यो भन्ने मृगतृष्णा थियो, अहिले दृढ सरकार छ , उनले भने, भौगोलिक अखण्डता र राष्ट्रिय हित संरक्षणमा दृढ सरकार छ ।
‘हामी हाम्रो भूमि फिर्ता ल्याउँछौं, हाम्रो भूमिबाट छिमेकीले सेना फिर्ता लैजाऊन् , उनले भने । प्रधानमन्त्री ओलीले भारतसँग कुनै पनि हालतमा तनाव गर्ने पक्षमा सरकार नरहेको बताउँदै संवादबाटै सीमा विवाद समाधान गर्ने प्रक्रिया अघि बढेको जानकारी दिए ।
‘छिमेकीसँग तनाव नहोस् भन्ने हामी चाहन्छौं, अहिलेको सरकार संवाद गर्न नसक्ने छैन’, उनले भने, ‘राष्ट्रिय हितका पक्षमा अड्न र लड्न सक्छ ।’
प्रकाशित मिति: आइतबार, मंसिर १, २०७६ ०७:३१
