काठमाडौं । प्रमुख सत्तारुढ दल नेपाल कम्युनिस्ट पार्टी (नेकपा) काे सचिवालय बैठक आज अपराह्न बस्ने भएकाे छ । नेकपा अध्यक्ष एवं प्रधानमन्त्री केपी शर्मा ओलीले सचिवालय बैठक बोलाएका हुन् ।
आज अपराह्न ४ बजे प्रधानमन्त्री निवास बालुवाटारमा सचिवालय बैठक बस्ने बताइएकाे छ । बैठकमा पार्टीको प्रवास कमिटीको जिम्मेवारी तोक्ने र स्थायी समितिको बैठक बोलाउने बारेमा छलफल हुने छ ।
प्रधानमन्त्री केपी शर्मा ओली तेस्रो पटक हेमोडायलसिस गरेर फर्केपछि बस्न लागेको बैठकका एजेन्डाबारे सचिवालय सदस्यहरु भने अझै अनविज्ञ छन् । पुनः मृगौला प्रत्यारोपण गर्ने तयारीमा रहेका ओली कम्तीमा ३ देखि ५ महिना आराममा बस्नुपर्ने भएकाले त्यसअघि पार्टी तथा सरकारको जिम्मेवारी हस्तान्तरण गर्ने तयारीमा छन् ।
प्रधानमन्त्रीकाे अनुपस्थितिमा सरकारको नेतृत्व कार्यबाहक प्रधानमन्त्रीको हैसियतमा ईश्वर पोखरेललाई दिइने तयारी भएकाे नेकपा स्राेतले जनाएकाे छ ।
यसैगरी ओलीले अर्का अध्यक्ष प्रचण्डलाई पार्टीकाे कार्यकारी भूमिका दिने तयारी गरेका छन् । स्राेतका अनुसार ओलीले औपचारिकरूपमै प्रचण्डलाई पार्टीको कार्यकारी अध्यक्ष र पोखरेललाई कार्यबाहक प्रधानमन्त्री दिएर स्वास्थ्योपचारमा जाने छन् ।
प्रकाशित मिति: आइतबार, मंसिर १, २०७६ ०६:५९