काठमाडाैं । प्रतिनिधिसभा सदस्य एवं पूर्वउद्योगमन्त्री महेश बस्नेतले उपचुनावलाई प्रभाव पार्ने गरी पैसा बाँड्ने तत्वको पैसा कब्जा गर्न युवालाई निर्देशन दिएका छन् ।
अनेरास्ववियू तथा राष्ट्रिय युवा संघ नेपाल भक्तपुरद्वारा संयुक्तरुपमा भक्तपुर क्षेत्र नं १ (क) का नेकपाका प्रदेशसभा उम्मेदवार डिपी ढकालको चुनावी प्रचार अभियानअन्तर्गत बुधबार कमलविनायकमा आयोजित युवा तथा विद्यार्थी भेलामा उनले सो निर्देशन दिएका हुन् ।
नेपाल कम्युनिस्ट पार्टी (नेकपा) का केन्द्रीय सदस्य एवं राष्ट्रिय युवा संघ नेपालका इन्चार्जसमेत रहेका सांसद बस्नेतले भने, आगामी मङ्सिर १४ गतेको उपनिर्वाचनसम्म युवा गाउँगाउँमा परिचालन हुनुस् । गाउँमा मतदातालाई पैसा बाँडेर वा उपहार दिएर भोट किन्न कोही आउँछन् भने त्यो पैसा कब्जा गर्नुस् । कब्जा गरिएका पैसा त्यही ठाउँको विकासमा लगाउँला । कसैले कानुन हातमा लियो भन्छ भने जे पर्छ हामी व्यहोर्छौं ।
विगतको निर्वाचनका समयमा केही राजनीतिक दलले पैसामा जनतालाई किन्ने प्रयास गरेको चर्चा गर्दै उनले आगामी निर्वाचनमा पैसाको भरले नेकपालाई हराउन सकिन्छ कि भन्ने सपना नदेख्न विपक्षीलाई आग्रह गरे ।
जनतालाई भेडाबाख्रा जस्तो किनबेच गर्ने जमना अब सकियो । अबको चुनावमा सूर्य उदाएपछि नेकपाको अभियान सुरु हुन्छ, सांसद बस्नेतले भने, सूर्य अस्ताएपछि बन्द हुन्छ । तर केही राजनीतिक दलको अभियान सूर्य अस्ताएपछि सुरु हुन्छ, सूर्य अस्ताएपछि अँध्यारोमा सुरु हुने अभियानलाई निस्तेज पार्नैपर्छ ।
आजदेखि मतगणना नसकिएसम्म निर्वाचनको सुरक्षाको जिम्मा युवा र विद्यार्थीको काँधमा रहेको उल्लेख गर्दै उनले चुनावलाई प्रभावित पार्ने गलत कार्यलाई रोक्न आजैदेखि लाग्न र नेकपाको पक्षमा पहरेदार भएर उभिन पनि निर्देशन दिए ।
कार्यक्रममा नेकपा भक्तपुरका इन्चार्ज दिलीप प्रजापति, सहइन्चार्ज तथा चाँगुनारायण नगरपाकिालका प्रमुख सोम मिश्र, नेकपा भक्तपुरका जिल्ला अध्यक्ष वचन देउजा, उम्मेदवार डिपी ढकाल, राष्ट्रिय युवा संघका संयोजक रामप्रसाद सापकोटा ‘दीपशिखा’, सहसंयोजक रमेश पौडेल, अनेरास्ववियूका संयोजक ऐन महरलगायतले उपनिर्वाचन नेकपाको पक्षमा हुने दाबी गरे । रासस
प्रकाशित मिति: बिहीबार, कात्तिक २८, २०७६ ०१:३४
