काठमाडौं । भारतीय नक्सामा कालापानी, लिपुलेक लगायत नेपाली भूमि समावेश गरिएपछि आन्दालित प्रमुख प्रतिपक्ष दल नेपाली कांग्रेसकाे विद्यार्थी संगठन नेपाल विद्यार्थी संघले प्रधानमन्त्री केपी शर्मा ओलीको राजीनामा मागेकाे छ ।
नेविसंघले मंगलबार बिहान काठमाडाैंको चाबहिलमा प्रदर्शन गर्दै प्रधानमन्त्री ओलीको राजीनामा माग गरेकाे हाे । विद्यार्थीहरूले ‘सरकार कता हरायो, राष्ट्रियता जोगाउन डरायो’ भन्दै सरकारविरुद्ध चर्का नाराबाजी पनि गरेका थिए ।
‘साथ दिन प्रतिपक्षी यहाँ छ, प्रधानमन्त्रीज्यू हाम्रो कालापानी कहाँ छ ?’ भन्ने नारा पनि नेविसंघले लगाएको थियो । नेविसंघ, काठमाडौं जिल्ला समितिको आह्वानमा आयोजना गरिएको सो विरोध प्रर्दशनमा राष्ट्रियता जोगाउन अपिल गर्दै सडकमा आउन पनि सबैलाई अपिल गरिएको छ ।
अतिक्रमित भूमि फिर्ता ल्याउन र भारतसँग कूटनीतिक पहल गर्न प्रधानमन्त्री असफल भएको आरोप नेविसंघको छ । सभापति शेरबहादुर देउवाले राष्ट्रियताको पक्षमा आन्दोलन गर्न निर्देशन दिएपछि दिनुहुँजसो नेविसंघले सडकमा प्रदर्शन गर्दै आएको छ ।
प्रकाशित मिति: मंगलबार, कात्तिक २६, २०७६ ०७:४२