काठमाडौँ । गृहमन्त्री रामबहादुर थापा र नेपाल भ्रमणमा रहेका चीनका आपतकालीन व्यवस्थापन मन्त्रालयका उपमन्त्री जेङ गुग्वाङबीच शिष्टाचार भेटवार्ता भएको छ ।
गृह मन्त्रालयमा भएको भेटमा नेपाल–चीनबीचको द्विपक्षीय सम्बन्ध, आपसी हित र विपद् व्यवस्थापनमा दुई देशबीच सहकार्यका विषयमा छलफल भएको थियो ।
भेटमा गृहमन्त्री थापाले गत महिना चिनियाँ राष्ट्रपति सी जिनपिङको नेपाल भ्रमणको क्रममा विपद् व्यवस्थापन सम्बन्धी सम्झौता भएको स्मरण गर्दै सो सम्झौता कार्यान्वयनको प्रक्रियामा गइसकेको जानकारी दिए ।
प्राकृतिक विपद्का घटना दुवै देशको साझा समस्या रहेको भन्दै अनुभवको आदान–प्रदान र सहकार्यका माध्यमबाट दुई देशले विपद् व्यवस्थापनमा सहकार्य बढाउँदै लैजानुपर्नेमा उनले जोड दिए ।
गृहमन्त्री थापाले नेपालको विकास, विपद् व्यवस्थापन तथा भूकम्पपछिको पुनःनिर्माण लगायतका क्षेत्रमा चीनले गर्दै आएको सहयोगप्रति धन्यवाद व्यक्त गर्दै आगामी दिनमा थप सहयोगको अपेक्षा गरेको बताए ।
भेटवार्तामा उपमन्त्री जेङले विपद् व्यवस्थापनको क्षेत्रमा नेपाल–चीनबीच सहकार्यमा जोड दिँदै चीनले गर्दै आएको सहयोग बढाइने जानकारी दिए । उनले केही समयपछि विपद् व्यवस्थापनसम्बन्धी मन्त्रीस्तरीय सम्मेलन चीनमा आयोजना हुन लागिरहेको जानकारी दिँदै सो सम्मेलनमा उपस्थितिका लागि गृहमन्त्री थापालाई निम्तासमेत दिएका छन् ।
प्रकाशित मिति: सोमबार, कात्तिक २५, २०७६ १०:३५
