काठमाडौं । प्रमुख सत्तारुढ दल नेकपा अध्यक्ष पुष्पकमल दाहाल प्रचण्ड ले कालापानी, लिपुलेकलगायत क्षेत्रमा देखिएकाे सीमा समस्यालाई अन्तर्राष्ट्रियकरण गर्नुभन्दा पनि कूटनीतिक पहलमार्फत नै समाधान गर्नतर्फ लाग्नुपर्ने बताएका छन् ।
संघीय संसद्अन्तर्गत प्रतिनिधिसभाको राज्य व्यवस्था समितिकाे बैठकमा धारणा राख्दै प्रचण्डले यस्तो बताएका हुन् । बैठकमा पूर्वप्रधानमन्त्रीसमेत रहेका प्रचण्डले भने, ‘अहिले यसलाई अन्तर्राष्ट्रियकरण गर्ने नभनौँ । यदि गम्भीर वार्ता गर्दा पनि समाधान नभए पछि हेरौँला ।’
प्रचण्डले भारतसँग गम्भीर वार्ता गर्ने उपयुक्त समय आएको बताए। ‘विगतमा स्थिर प्रकृतिको सरकार नहुँदा यस्ता समस्या देखिएको हो’, उनले भने, ‘नेपालको १ इन्च पनि जमिन छोड्दैनौँ र अर्काको भूमि पनि लिँदैनौँ।’
भारतले हालै जारी गरेको नयाँ राजनीतिक नक्सामा कालापानी, लिपुलेक तथा लिम्पियाधुरा लगायत नेपाली भूमि समेत परेपछि त्यसै सम्बन्धमा छलफल गर्न समितिले बैठक बाेलाएकाे हाे ।
यसैबीच, गृहमन्त्री रामबहादुर थापाले कालापानीमा सुरक्षा पोस्ट राख्ने तयारी भइरहेको बताएका छन् । बैठकमा सहभागी हुँदै मन्त्री थापाले दार्चुलामा सीमा सुरक्षा बल रहे पनि विवादित भूमिमा सुरक्षा पोस्ट नरहेकाले राख्न लागिएको जानकारी गराए ।
दार्चुलामा सीमा सुरक्षा बल छ । विवादित क्षेत्रमा छैन, अपुग छ । त्यसलाई मजबुत गर्नुपर्छ , उनले भने, विवादित क्षेत्रमा सुरक्षा पोस्ट विस्तार गर्ने तयारी भइरहेकाे छ । उनले कालापानीको समस्या ६ दशक लामो भएको बताउँदै समस्या समाधानमा सरकार गम्भीर रहेको दाबी गरे ।
प्रकाशित मिति: सोमबार, कात्तिक २५, २०७६ ०७:०५
