काठमाडौं । सत्तारूढ नेपाल कम्युनिस्ट पार्टी (नेकपा) ले पार्टीका केन्द्रीय निकाय तथा आयोगको नेतृत्व टुंगो लगाएको छ । सोमबार प्रधानमन्त्रीको सरकारी निवास बालुवाटारमा बसेको सचिवालय बैठकले विभिन्न निकायको नेतृत्व टुंग्याएको हो ।
केन्द्रीय अनुशासन आयोगको अध्यक्षमा अमृत बोहरा, सचिवमा अशोक रोकाया चयन भएका छन् । यस्तै केन्द्रीय निर्वाचन आयोगको अध्यक्षमा विष्णुपुकार श्रेष्ठ, सचिवमा माधव पौडेल छानिएका छन् ।
लेखा परीक्षण आयोगको अध्यक्षमा पुष्प कँडेल र सचिवमा टेकनाथ आचार्य छन् भने केन्द्रीय सल्लाहकार कमिटीको अध्यक्षमा केशव बडाल र सचिव नन्दकुमार थापा चयन भएकाे नेकपा सचिवालयले जनाएकाे छ । यसैगरी जेष्ठ कम्युनिस्ट मञ्चको अध्यक्षमा नन्दकुमार प्रसाईं र सचिवमा गोविन्द ज्ञवाली चयन भएका छन् ।
नेकपाले प्रवास संगठन भने नबनाउने भएको छ। प्रवासमा पार्टी कमिटी गठन नगर्ने निर्णय पार्टीले यसअघि नै गरिसकेको भए पनि प्रवासी नेपालीको हकहितका लागि कुनै किसिमको संरचना निर्माण गर्ने विषयमा छलफल भइरहेको प्रवक्ता नारायणकाजी श्रेष्ठले जानकारी दिए ।
प्रकाशित मिति: सोमबार, कात्तिक २५, २०७६ ०६:२८