काठमाडौं । सुदूरपश्चिम प्रदेशका उद्योग, पर्यटन, वन तथा वातावरण राज्यमन्त्री प्रकाश रावलले पदबाट राजीनामा दिएका छन् । ठगी र किर्ते मुद्दामा फरार रहेका मन्त्री रावलले आइतबार मुख्यमन्त्री त्रिलोचन भट्टसमक्ष राजीनामा बुझाएका हुन् ।
कीर्ते गरेर पौने १६ करोड ठगीको अभियोग लागेका नेकपाका प्रदेश राज्यमन्त्री रावलको मुद्दा अहिले जिल्ला अदालत कञ्चनपुरमा विचाराधीन छ । रावललाई जिल्ला अदालत कञ्चनपुरले साधारण तारेखमा छाडेको छ।
कञ्चनपुरको महेन्द्रनगरस्थित जनज्योति बहुमुखी क्याम्पसको सेयर बिक्रीमा सरकारी कागजात कीर्ते गरेको र ठगी गरेको आरोपमा राज्यमन्त्री रावलसहित ३६ जना सेयर सदस्यका नाममा गत साउन ७ गते जिल्ला अदालतमा मुद्दा दर्ता गरेको थियो।
जनज्योति एजुकेसन फाउन्डेसन कञ्चनपुर पब्लिक लिमिटेडको नाममा ठगी गरेर मन्त्री रावलसहितका अधिकारीले अवैध सम्पत्ति आर्जन गरेको खुलेपछि सम्पत्ति शुद्धीकरण अनुसन्धान विभागले विभिन्न कार्यालयमा छापा मारेर मन्त्रीसहितका अभियुक्तहरुको सम्पत्ति रोक्का गरेको थियाे ।
प्रकाशित मिति: आइतबार, कात्तिक २४, २०७६ ०८:५५
