काठमाडौं । साझा पार्टीले कास्की क्षेत्र नम्बर २ मा केन्द्रीय सदस्य रजनी केसीलाई उम्मेदवार बनाउने निर्णय गरेको छ ।
कास्की क्षेत्र नम्बर २ मा साझा पार्टीले सबैभन्दा पहिले उम्मेदवारको टुंगो लगाएको हो । साझा पार्टीकी उम्मेदवार रजनी केसी लामो समयदेखि सामाजिक अभियन्ता रहेको पार्टीले जनाएको छ । उनले सुरक्षित मातृत्व सञ्जाल महासंघ, नेपाल परिवार नियोजन संघलगायत विभिन्न संघ संस्थाहरुमा नेतृत्वदायी जिम्मेवारी सम्हाल्नुका साथै लामो समय विभिन्न तह र तप्कामा रहेर राजनीतिक अनुभव लिएकी छिन् ।
गत वैशाखमा पोखरा विश्वविद्यालयको उपप्रशासक पदबाट राजीनामा दिएर केसी साझा पार्टी प्रवेश गरेकी थिइन् ।
कास्की क्षेत्र नम्बर २ बाट बाम गठबन्धनको तर्फबाट निर्वाचित भएका तत्कालीन नेकपा एमालेका रवीन्द्र अधिकारीकाे गत १५ फागुनमा हेलिकप्टर दुर्घटनामा निधन भएपछि प्रतिनिधिसभाका लागि उक्त क्षेत्रमा उपनिर्वाचन हुन लागेको हो ।
प्रकाशित मिति: बुधबार, कात्तिक ६, २०७६ ०८:४८