राष्ट्रपति विद्यादेवी भण्डारी आज (बुधबार) म्यानमार प्रस्थान गर्दैछिन् । म्यान्मारका राष्ट्रपति ऊ विन मिन्तको निमन्त्रणामा राष्ट्रपति भण्डारीले आजदेखि कात्तिक ३ गतेसम्म त्यहाँको राजकीय भ्रमण गर्न लागेकी हुन् ।
भ्रमणका क्रममा राष्ट्रपति भण्डारीले आफ्ना समकक्षी मिन्तसँग द्विपक्षीय वार्ता गर्ने कार्यक्रम रहेको परराष्ट्र मन्त्रालयले जानकारी दिएको छ ।
उनले बगानमा युनेस्को विश्वसम्पदा क्षेत्र, पूर्व राजधानी शहर यंगुनका ऐतिहासिक र सांस्कृतिक महत्वका ठाउँका पनि भ्रमण गर्ने तयारी छ । राष्ट्रपति भण्डारी म्यानमारबाटै जापान पनि जाने तयारी छ ।
जापानका नयाँ राजा नारुहितोको गद्दी आरोहण समारोहमा पनि राष्ट्रपति भण्डारी उपस्थित हुनेछिन् । म्यानमार र जापानको भ्रमण सकेर राष्ट्रपति भण्डारी आउँदो ६ गते स्वदेश फर्कने कार्यक्रम छ ।
राष्ट्रपति भण्डारीको प्रतिनिधिमण्डलमा परराष्ट्रमन्त्री प्रदीप ज्ञवाली, परराष्ट्र मन्त्रालय र राष्ट्रपति कार्यालयका सचिव, राष्ट्रपति कार्यालय र परराष्ट्र मन्त्रालयका उच्चपदस्थ अधिकारी तथा सञ्चारकर्मी रहने परराष्ट्र मन्त्रालयले जनाएको छ ।
प्रकाशित मिति: बुधबार, असोज २९, २०७६ ०५:२८