काठमाडौ । प्रधानमन्त्री केपी शर्मा ओलीले सुशासन कायम गर्नका लागि प्रहरीको भूमिका महत्वपूर्ण हुने बताएका छन् ।
६४औं प्रहरी दिवसको अवसरमा प्रहरी प्रधान कार्यालयले आयोजना गरेको कार्यक्रममा बोल्दै प्रधानमन्त्री ओलीले सो कुरा बताएका हुन् ।
प्रधानमन्त्री ओलीले अपराधमा संलग्न जोसुकैलाई पनि कानुनको दायरामा ल्याउन प्रहरीलाई निर्देशनसमेत दिए । ‘गैरकानुनी काम गर्ने जुनसुकै पार्टीको र जुनसुकै पदको भए पनि अनुसन्धानको दायरामा ल्याउनुहोस्’, उनले भने, ‘तपाईंहरुले अरु कसैले भनेअनुसार होइन कानुनले भने अनुसार काम गर्नुपर्छ ।’
प्रधानमन्त्री ओलीले समाजमा प्रहरीको बहुआयामिक भूमिका हुने बताए । समाजमा शान्ति कायम गर्न, सुशासन कायम गर्न, सामाजिक जनचेतना जगाउन प्रहरीको खास भूमिका हुन्छ’, प्रधानमन्त्री ओलीले भने, ‘नेपाल प्रहरीकै कारणले समाजमा शान्ति कायम भएको छ, अपराध घटेको छ ।’
प्रधानमन्त्री ओलीले देशमा राजनीतिक संघर्षको युग सकिएर विकास र समृद्धिको युग सुरु भएको स्मरण गर्दै यसबेला विभिन्न बहानामा समाजमा हिंसा भड्काउन खोज्नेहरुसँग सरकार मुकदर्शक नबन्ने बताए । ‘आर्थिक उन्नति र विकासको अभियान सुरु भएको यस समयमा गलत मनसायका साथ हिंसाको बाटोमा लागेका र जनतालाई शान्तिसँग बस्न नदिनेहरु असंवैधानिक र देशद्रोही हुन्’, ओलीले भने, ‘उनीहरुका अगाडि सरकार मुकदर्शक बन्दैन । कानुनबमोजिम कारबाही हुन्छ ।’
कार्यक्रममा प्रधानमन्त्री ओलीले नेपाल प्रहरीको वार्षिक प्रकाशन ‘पुलिस मिरर –२०७६’ विमोचन गरेका थिए ।
प्रकाशित मिति: शुक्रबार, असोज २४, २०७६ ०६:५६