भक्तपुर । कांग्रेस पक्षधर नगरसभाका बहुमत सदस्यहरुको उपस्थितिमा दुई महिनाअघि उपप्रमुखको सभापतित्वमा सम्पन्न भएको मध्यपुर थिमि नगरपालिकाको नगरसभाकै नीति, कार्यक्रम र बजेटका विषयहरु समेट्ने सहमतिपछि मध्यपुर थिमि नगरपालिकाको चौथो नगरसभा औपचारिक रुपमा सम्पन्न भएको छ ।
असार १० गते नै सम्पन्न हुनुपर्ने नगरसभा नगरप्रमुख मदनसुन्दर श्रेष्ठको अडान, अहम् र चलखेलका कारण निर्धारित समयभन्दा ३ महिनापछि धकेलियो । कांग्रेस नेता अष्ट कवेसँग नेकपा भक्तपुरका नेता र मेयर श्रेष्ठले कांग्रेसका सबै नीति, योजना तथा कार्यक्रममा बजेट खर्च गर्ने सहमति गरेपछि नगरसभा सम्पन्न भएको हो ।
असोज ३ गते पारित नीति, कार्यक्रम, योजना र बजेटको कार्यान्वयन कसरी गर्ने भन्ने चुनौती अहिले नगरपालिकासामु छ । नगरसभाले १ अर्ब ६२ करोड ९५ लाखको बजेट पारित गरेको छ । तर, यस आर्थिक वर्षको २ महिनाको समय विवादकै बीच खर्चिएको नगरपालिकासँग योजना र कार्यक्रमहरु सञ्चालन गर्ने समय अब १० महिनामात्र बाँकी छ । यस अवधिमा मेयर श्रेष्ठले कांग्रेससँग झुकेर गरेको सहमति पालना गरेनन् भने पुनः विवाद बढ्न सक्ने सम्भावना छ । मेयर श्रेष्ठको स्वभाव मिलेर अघि बढ्ने खालको छैन । नगरसभाबाट बजेट र योजना पारित भएपछि आफूखुसी चल्ने उनको बानीका कारण फेरि विवाद बढ्ने सम्भावना प्रबल छ ।
कार्यक्रम र बजेट नै पारित गर्न नसकेको नगरपालिकाले कसरी पारित कार्यक्रमहरु कार्यान्वयन गर्ला त ? भन्ने चासो र जिज्ञासा आममध्यपुरबासीको छ । गत वर्षकै नियमित योजनाहरुको कार्यान्वयन समेत हुन सकिरहेको छैन । नगरका हरेक योजना अलपत्र छन् । सडकहरु हिँड्न नसक्ने गरी हिलाम्मे अवस्थामा छन् ।
नगरपालिका प्रमुख श्रेष्ठ पछिल्लो समय काम गर्नमा भन्दा विदेश घुमेर रमाउनमै व्यस्त हुन थालेका छन् । भदौको दोस्रो साता वातावरण र फोहोरमैलाकै कार्यक्रममा एक्लै १० दिन नेदरल्यान्ड घुमेर फर्किएका मेयर नगरसभा सक्किएलगत्तै असोज ७ गते पुनः सोही कार्यक्रमका लागि भन्दै नगरपालिकाका प्रमुख प्रशासकीय अधिकृत महेश बराललाई लिएर एक हप्ताका लागि जापान उडेका छन् ।
न्यौपाने भवनको नक्सा पास गर्ने तयारी
१४ वर्षभन्दा बढी समयदेखि नक्सा पास नभई अलपत्र अवस्थामा रहेको राधेराधेस्थित न्यौपाने भवनको नक्सा पास गर्ने चलखेल सुरु भएको बताइएको छ । प्रमुख प्रशासकीय अधिकृत बराल र नगर प्रमुख श्रेष्ठको जोडबलमा नक्सा पास गर्ने चलखेल सुरु भएको हो । साढे ५ तल्लासम्मको नक्सा पास गरेर नियम विपरीत साढे १७ तल्ला बनाएको भन्दै तत्कालीन समयमा निर्माण कार्य रोकिएको न्यौपाने भवनलाई अहिले वैधानिकता प्रदान गर्न चलखेल भएको नगरपालिकाका एक कर्मचारीले बताए ।
विष्णु न्यौपानेले आफ्नो निर्माणाधीन भवनको निर्माण सम्पन्न गर्न १७ तलाको नक्सा पासको स्वीकृति गराउन यसअघिका प्रमुख प्रशासकीय अधिकृत कमल ज्ञवालीलाई समेत दबाब दिएका थिए । तर, कार्यकारी प्रमुख ज्ञवालीले कुनै पनि हालतमा अनधिकृत र नियम विपरीत बनाएका भवनलाई वैधानिकता प्रदान गर्न नसकिने भन्दै रोकेका थिए ।
अहिले फेरि नगर प्रमुख श्रेष्ठ र प्रमुख प्रशासकीय अधिकृत बराल जरिवाना तिराएरै भए पनि भवनको नक्सा पास गरिदिने तयारीमा लागेका हुन् । उनीहरुको एक हप्ते जापान भ्रमण लगत्तै उक्त नियम विपरीत बनेको भवनको नक्सा पास गर्ने तयारी गरेको नगरपालिकाका कर्मचारीले बताए ।
प्रकाशित मिति: बिहीबार, असोज ९, २०७६ १६:५३
